Իսրայելը Հայոց ցեղասպանությունը ճանաչող օրինագիծը Քնեսեթում կքննարկի Թուրքիայի խորհրդարանական ու նախագահական արտահերթ ընտրություններից հետո:
Ինչպես հաղորդում է Haaretz-ը, իսրայելցի պաշտոնյաները երկրի ԱԳ նախարար Բենիամին Նեթանյահուին խորհուրդ են տվել Հայոց ցեղասպանության ճանաչման մասին խորհրդարանական քննարկումները հետաձգել մինչև Թուրքիայում տեղի կունենան արտահերթ խորհրդարանական ընտրություններ, որոնք նշանակված են հունիսի 24-ին: Հակառակ դեպքում Իսրայելում մտավախություն ունեն, որ Հայոց ցեղասպանության մասին քննարկումները կարող են օգտագործվել Թուրքիայի նախագահ Ռեջեփ Թայիփ Էրդողանի նախընտրական քարոզարշավում՝ օգնելով նրան թուրք ժողովրդին միավորել իր կուսակցության շուրջը և լրացուցիչ առավելություն ապահովել առաջիկա ընտրություններում:
Հիշեցնենք, որ մայիսի 23-ին Քնեսեթը հավանություն էր տվել Հայոց ցեղասպանության ճանաչման հարցով լիագումար քննարկում անցկացնելու նախաձեռնությանը։ Իսկ արդեն մայիսի 29-ին Իսրայելի Քնեսեթի խոսնակ Յուլի Էդելշտեյնը հարցը հանեց օրակարգից։ Ավելի ուշ Էդելշտեյնի մամլո խոսնակը այս որոշումը մեկնաբանեց այն հանգամանքով, որ իրենք վստահ չէին, թե մեծամասնությունը կողմ կքվեարկի։
Պատրաստեց՝ Վիկտորյա ԱՆԴՐԵԱՍՅԱՆԸ
