«Հունիսի 15-ին դատարանը հնարավորություն ունի կայացնելու մի որոշում, որը նրան հնարավորություն կտա հայտնվել նոր իրողությունների մեջ»,- ՀՀ վճռաբեկ դատարանի առաջ ի պաշտպանություն քաղբանտարկյալների բողոքի ցույցի ընթացքում հայտարարեց Անդրանիկ Թևանյանը:
Նա տեղեկացրեց, որ հանրային պահանջի արդյունքում ՀՀ վճռաբեկ դատարանը որոշել է. հունիսի 15-ին ժամը՝ 11-ին, տեղի է ունենալու Սամվել Բաբայանի վճռաբեկ բողոքի հետ կապված նիստ:
Ըստ պարոն Թևանյանի՝ զուտ իրավական առումով կա մի քանի տարբերակ. «Դատարանը պետք է հասկանա, որ դա իր դատավճիռը կլինի, եթե կայացնեն բացասական որոշումը և ուժի մեջ թողնեն վերաքննիչի որոշումը: Դատելով դեպքերի ընթացքից՝ կարող ենք ասել, որ այդ տարբերակը բացառվում է»:
Անդրանիկ Թևանյանը խորհուրդ տվեց դատարաններին. «Եթե չգիտեք՝ ինչպես վարվել, վարվեք օրենքով: Դա ձեզ հնարավորություն կտա պահպանել դեմքը և ինտեգրվել նոր իրողությունների հետ, որի անունը դրել ենք նոր Հայաստան»:
Տաթև ՀԱՐՈՒԹՅՈՒՆՅԱՆ
