Այսօր ֆինանսների նախարար Ատոմ Ջանջուղազյանը 2017-ի պետբյուջեի կատարման հաշվետվությունը ներկայացնելիս խոսեց ճանապարհային ոստիկանության կողմից շրջանառվող արտաբյուջետային միջոցներից: «Ծառուկյան» խմբակցության պատգամավոր Նաիրա Զոհրաբյանը հարցրեց՝ «Կառավարության ծրագրում խնդիր է բարձրացվում ընդհանրապես վերանայել արտաբյուջեների համակարգը: Հիմա դուք ասում եք՝ այսքան այստեղ է գնացել արտաբյուջեներից, այնքան այնտեղ է գնացել, մենք բոլորս հասկանում ենք, որ շատ դեպքերում արտաբյուջեն եղել է ստվերային կասսա, որ տվյալ կառույցի ղեկավարը ոնց ուզել՝ տնօրինել է: Հիմա ինչ էլ ասեք, ինձ համար հավաստի չի լինելու: Եթե արտաբյուջե է, դուք շատ լավ հասկանում եք, որ այդտեղ տվյալ կառույցի սուբյեկտիվ մոտեցումն է լինելու՝ հանրային գումարներին: Չեք կարծում, որ պետք է վերանայել դա»:
«Ես շատ ափսոսում եմ ձեր կանխակալ վերաբերմունքի համար»,- պատասխանեց Ջանջուղազյանը՝ վստահեցնելով՝ «Չի կարող որեւէ պետական մարմնի ղեկավար ինքնուրույն տնօրինել մի բան, որի նախահաշիվը հաստատում է կառավարությունը»:
Ըստ Ջանջուղազյանի, հանրությունը հնարավորություն ունի տեսնելու, թե ուր են գնում արտաբյուջեները: Նաիրա Զոհրաբյանն էլ հակադարձեց՝ «Ինչպես են կառավարությունում մինչ այս կայացվել որոշումները, դուք, որպես մերձ կառավարությանը, վստահաբար, ոչ որոշում կայացնող, բայց խաղի կանոններին տեղյակ, գիտեք ինչպես է եղել: Ես գտնում եմ, որ արտաբյուջեներ չպետք է լինեն, եթե կարելի է բյուջեով կարգավորել»:
Արտաբյուջեների հարցը մտահոգել էր նաեւ «Ծառուկյան» խմբակցության պատգամավոր Վարդան Բոստանջյանին: Ըստ նրա, կարող է թյուր կարծիք ձեւավորվի, որ արտաբյուջեն կարող է մնալ, բայց ամբողջ աշխարհում ակնհայտ է, որ մինչեւ անգամ իդեալական կառավարություն ունենալու պարագայում այդ հարցը չպիտի լինի. «Ի՞նչ արտաբյուջետային շրջանառություն, դա կրիմինալ ինստիտուտ է, ստվերային շրջանառություն է…Օրինակ, ոստիկանության արտաբյուջետային ֆոնդը որտեղի՞ց է ձեւավորվում՝ ինչքան շատ բռնենք, տուգանենք, իրավախախտում ֆիքսենք, այնքան շատ արտաբյուջետային կլինի: Դուք դա համարում եք ճի՞շտ: Նման բան չի կարող լինել, որ եկամուտ առաջացավ, եկամուտից լինի արտաբյուջե: Արտաբյուջետային ֆոնդերը պետք է հանել եւ շպրտել դուրս, առավել եւս, որ կառավարությունն ունի պահեստային ֆոնդ, հարցեր առաջացավ՝ այդ ֆոնդից կարող են լուծել: Արտաբյուջետային ֆոնդերը բոլոր նախարարություններին արեք, ինչո՞ւ հատկապես ուժային գերատեսչությունները պետք է ունենան նման ֆոնդ, երբ մենք չենք կարողանում դրա թափանցիկությունը տեսնել»:
Ջանջուղազյանը զարմացավ՝ Բոստանջյանը համարյա հաղորդում է ներկայացնում հանցագործության մասին՝ ասելով, թե կրիմինալ է, մինչդեռ այդ հարցի պատասխանը տալիս է օրենքը, օրենքով են ոստիկանությանը արտաբյուջեի հնարավորություն տալիս. «Աշխարհի փորձը շատ բազմազան է, տարբեր լուծումներ են տրված: Մենք պետք է գնանք մեր ճանապարհով՝ ճիշտ փոխզիջումային լուծումներ գտնելով: Ամենեւին այն իրավիճակը չի, որ միայն ուժայինները ունեն նման ֆոնդ՝ Մարդու իրավունքների պաշտպանին դժվար է ուժային համարել, մի սանրով սանրելը ճիշտ չէ»:
Ինչ վերաբերում է ստվերայնությանը՝ Ջանջուղազյանն ասաց, որ ծրագրերը նույնչափ վերահսկվում են, որքան բյուջետային մյուս ծրագրերը, ուրիշ հարց է, որ արտաբյուջետային ծրագրերը կառավարությունն է հաստատում, իսկ բյուջետայինը՝ խորհրդարանը:
Բոստանջյանն էլ պատասխանեց, որ օմբուդսմենի արտաբյուջետային ֆոնդը ձեւավորվում է դրամաշնորհներից, իսկ մյուս կառույցներինը կարող են հասարակությունից փող պոկել ու դրա անունը դնել արտաբյուջետային ֆոնդ:
Հռիփսիմե ՋԵԲԵՋՅԱՆ
