ՀՀ ոստիկանապետ Վալերի Օսիպյանը չի բացառում, որ իր գործընկերներից մեկը կամ երկուսը պատասխանատվության ենթարկվեն ԱԱԾ-ի հայտարարած կոռուպցիոն սխեմաներով, բայց չի կարծում, որ ոստիկանությունը զանգվածաբար գործել է կոռուպցիոն տարբերակներով: Այս մասին այսօր խորհրդարանում լրագրողների հետ զրույցում ասաց նա: «Նախկինում եղել են ստորաբաժանումներ, որոնք կապ են ունեցել, բայց, որ ասեմ ոստիկանությունում տարածված է եղել նման երեւույթ, դա էլ ճիշտ չի լինի: Դրանք հիմնականում այն ստորաբաժանումներն են, որոնք առնչվում են քաղաքացիների հետ: Հիմնականում ՃՈ-ն է»,- ասաց նա:
Ոստիկանապետը հավաստիացնում է, որ այսօր ոստիկանությունում կոռուպցիոն տարրեր չկան:
Հարցին`ե՞րբ ենք ականատես կլինենք նախկին իշխանությունների օրոք ոստիկանության թույլ տված կոռուպցիոն սկանդալների բացահայտումներին, Վալերի Օսիպյանը պատասխանեց. «Ես չեմ կարող ասել, թե նախկին ոստիկանապետի ժամանակ ինչպես է եղել: Նախկինում ՃՈ-ն չի եղել իմ ենթակայության, բայց չբացառենք, որ եղել է կոռուպցիա»:
Լրագրողները հետաքրքրվեցին`ոստիկանությունում կոռուպցիոն երեւույթներն անհատակա՞ն դեպքեր են, թե՞ սխեմաներ են գործել: «Ոստիկանությունը տիրապետում է ամեն ինչին, անհրաժեշտությունը չկա, որ մենք բացահայտ հրապարակենք: Ունենք որոշակի դրվագներ, դեռ ընթացքի մեջ է»,- ասաց ոստիկանապետը:
Նելլի ԳՐԻԳՈՐՅԱՆ
