Հայաստանի և Ռուսաստանի միջև հարաբերությունները կարող էին ավելի խորը լինել, ինչպես մշակութային, այնպես էլ տնտեսության տեսանկյունից: Նման կարծիք է հայտնել Հայաստանի նախագահ Արմեն Սարգսյանը «Ռոսիա 24» հեռուստաալիքին տված հարցազրույցին:
«Անկեղծ ասած, ինձ մի փոքր չեն բավարարում մեր հարաբերությունները, քանի որ իմ ըմբռնմամբ մենք կարող էինք ավելի խորը և ընդգրկուն հարաբերություններ ունենալ: Ինձ չի բավարարում՝ ինչպես ենք մենք ներկայացված Ռուսաստանում, չնայած Ռուսաստանում շուրջ 3 միլիոն հայ է ապրում, այնքան, որքան Հայաստանում: Համայնքը հսկայական է, բայց ներկայության որակ չկա»,- ասել է Սարգսյանը՝ ընդգծելով, որ խոսքը կրթական և մշակութային ներկայության մասին է:
Նրա խոսքով՝ Հայաստանը կարող է դառնալ Ռուսաստանի և ԵԱՏՄ անդամ երկրների իրական գործընկերը որոշակի ոլորտներում, օրինակ նոր տեխնոլոգիաների: «Մեզ մոտ բուռն զարգանում է IT տեխնոլոգիան, ներուժ կա»,-հավելել է նախագահը:
Անդրադառնալով Հայաստանի անդամակցությանը ԵԱՏՄ-ին՝ Սարգսյանն ասել է, որ անդամակցության ներուժը ևս բավարարաչափ բացահայտված չէ: «Դեռ պետք է լավ աշխատել, մենք դեռ մեր գործընկերներին ցույց չենք տվել՝ ինչ կարող է Հայաստանը ներդնել: Իրականում կարող է դառնալ լավ, ուժեղ գործընկեր եվրասիական տարածությունում»,-կարծում է Արմեն Սարգսյանը:
Նա նաև ընդգծել է, որ Հայաստանը պայմանագիր է ստորագրել ԵՄ-ի հետ և կարող է նպաստել Եվրասիական տարածության և Եվրոպայի միջև հարաբերությունների բարելավմանը:
Արմեն Սարգսյանը նաև ասել է, որ լավ գիտի Ռուսաստանը՝ «Վլադիվոստոկից մինչև Կալինինգրադ» և չնայած երկար տարինել եղել է դեսպան արևմտյան երկրներում, իրեն հարմարավետ է զգում նաև Մոսկվայում, Աստանայում: Հայաստանի նախագահը խոստովանել է, որ երազում է լինել Ալթայի երկրամասում:
Լրագրողի այն հարցին՝ արդյոք հնարավոր է, որ ապագայում Արմեն Սարգյանը որոշի կուսակցություն հիմնել, Հայաստանի նախագահը պատասխանել է. «Առաջին հերթին դա կհակասի Հայաստանի Հանրապետության սահմանադրությանը: Ինչպես կարող է նախագահը, որը սահմանադրության երաշխավորն է, զբաղվել քաղաքականությամբ»:
Առավել մանրամասն՝ տեսանյութում:
https://www.youtube.com/watch?v=DqeISFXY5cs
Պատրաստեց՝ Վիկտորյա ԱՆԴՐԵԱՍՅԱՆԸ
