Ստեփանակերտի Ազատամարտիկների փողոցի ավտոկայանի հարակից հատվածը դարձյալ փակվել է ցուցարարների կողմից։ Նրանք հավաքվել են, որպեսզի բողոքի ցույցը համակարգող խորհրդի անդամներից տեղեկանան նախագահ Բակո Սահակյանի հետ երեկ ունեցած հանդիպման արդյունքները։
Ցույցի կազմակերպիչներից Դավիթ Սիմոնյանն հայտարարեց՝ Բակո Սահակյանը հայտնել է, որ իրենց կողմից բարձրացված պահանջները բավարարվելու են և ուժային համակարգում լինելու են փոփոխություններ, բայց թե երբ են կամ ինչպես՝ չի նշվել։
«Բակո Սահակյանը ասաց, որ իրեն ժամանակ է պետք, քանի որ պարտավոր է քննել իրավիճակը և ունենալ փաստարկներ, որից հետո կկատարվեն ցուցարարների պահանջները»,- հայտարարեց ցույցը համակարգող խորհրդի անդամ Վարդան Ասծատրյանը՝ նշելով, որ նախագահը հավաստիացրել է՝ չկատարելու պարագայում պատրաստ կլինի հրաժարական տալ և գալ ու կանգնել ցուցարարների կողքին։
Այնուհետև դիմելով ցուցարարներին Դավիթ Սիմոնյանը ասաց, որ նախագահը խնդրել է ցուցարարներին հեռանալ փողոցից՝ խոստանալով, որ պահանջները կատարվելու են․ «Հիմա դիմում եմ ձեզ, հեռանու՞մ եք փողոցից և սպասեք պահանջների կատարմանը»։
Ցուցարարները չհամաձայնեցին։ Դավիթ Սիմոնյանը հայտարարեց, որ ելնելով ցուցարարների պատասխանից՝ բողոքի ցույցը կշարունակեն այնքան ժամանակ, մինչև ներկայացված պահանջները կատարվեն։
Դավիթ ԱԲԱՂՅԱՆ
