Ստեփանակերտի Ազատամարտիկների փողոցի կենտրոնական ավտոկայանի հատվածը բողոքի ցույց կազմակերպած քաղաքացիների կողմից դարձյալ փակվել է: Հավաքվածները շարունակում են ներկայացնել իրենց պահանջները:
Ցույցի կազմակերպիչների հետ իրավիճակը քննարկելու և ելքեր որոնելու համար հավաքի վայր էին եկել ԱԺ պատգամավորներ Հայկ Խանումյանը, Դավիթ Մելքումյանը և Լեռնիկ Հովհաննիսյանը:
Հայկ Խանումյանը ելույթ ունեցավ և ասաց, որ երեկ երեկոյան անվտանգության խորհրդի անդամների և ԱԺ ներկայացուցիչների մասնակցությամբ նախագահ Բակո Սահակյանի կողմից անցկացվել է խորհրդակցություն: Հ. Խանումյանը նշեց, որ ինչ վերաբերում է ուժային կառույցների ղեկավարության հրաժարականի վերաբերյալ ցուցարարների պահանջին, ապա նախագահը համաձայն չէ առանց հիմնավոր պատճառի որևէ մեկին հեռացնել և պատրաստակամություն է հայտնել ուսումնասիրել ներկայացված տեղեկությունները: Դիմելով ցուցարարներին` Հ. Խանումյանը ասաց, որ անհրաժեշտ է հստակ կազմակերպվել և հստակեցնել օրակարգը, որոշել ինչ ճանապարհով պետք է հասնել պահանջների իրականացմանը, որպեսզի հնարավոր լինի արդյունքի հասնել:
Ցույցի կազմակերպիչներն էլ նշեցին, որ շտապելու տեղ չունեն և տալիս են ժամանակ, որպեսզի իրենց պահանջները կատարվեն:
Դավիթ ԱԲԱՂՅԱՆ
