Հունիսի 2-ին «Լոֆթում» մշակույթի նախարար Լիլիթ Մակունցի հետ հանդիպման ժամանակ մի երաժիշտ հետաքրքրվեց, թե ինչպես է նախարարն ընտրելու իր խորհրդականներին: Նախարարն ասաց, որ խորհրդականների թիվը կրճատվել է, այժմ ոչ թե երեքն է, այլ մեկը եւ այդ մեկն արդեն ընտրվել է՝ Դավիթ Մաթեւոսյանը, որը իրեն աջակցել է կինոոլորտի հետ կապված:
Մի համերգավար մշակույթի նախարարին առաջարկեց մշակութային ոստիկանություն եւ մշակութային ԱԱԾ ստեղծել: Նաեւ օրինակ բերեց. «Մի անգամ Խաչատուր Ավետիսյանի «Իմ անուշ տավիղ» գործը Իրանում լսել եմ տաքսու մեջ ու զարմացել: Երբ հարցրի՝ ինչ գործ է, ասաց, որ իրենց ազգայինն է»:
Համերգավարը նաեւ բողոքեց մշակութային թրաֆիքինգից, ասաց, որ շատ մշակութային հիմնարկներում ուղղակի ստորացնում են, բացօթյա համերգներին արեւների տակ ժամերով կանգնում են: Նախարարն առաջարկեց համագործակցության դեպքում օգտվել աշխատանքային օրենսգրքից, եւ եթե կարիք լինի դիմել մշակութային նախարարությունը:
Գոհար ՀԱԿՈԲՅԱՆ
