Նյու Յորքում բնակվող հայ բժիշկ, մեծ բարերար Հովհաննես Օյունջյանը հերթական ներդրումն է անում Գյումրիում․ նա պատրաստվում է գալ Գյումրի՝ այստեղ ֆիլհարմոնիա կառուցելու նպատակով։
Այս մասին Aravot.am-ի հետ հարցազրույցում տեղեկացրեց Գյումրու քաղաքապետ Սամվել Բալասանյանը։
«Իրենք մեր ժողգործիքների անսամբլին արդեն իսկ շենք ենք գնել, այս երկու օրը փաստաթղթերը վերջնականապես կձևակերպվեն: Նրանք այնտեղից դուրս կգան, պայմանավորվածություն կա և Մուրադ Մալխասյանի (վերջինս Գյումրու ժողգործիքների պետական նվագախմբի տնօրենն է, Ա․Ն․), և Հովհաննես Օյունջյանի ներկայացուցչի հետ, որ այդ տարածքը տանք, և իրենք ֆիլհարմոնիա սարքեն մեր քաղաքի համար։
Հրաշք մարդ է բժիշկը. նա անդադար ծրագրեր է իրականացնում մեր քաղաքում, այդքան շենքեր սարքեց, հիմա նորից ուզում է սարքել, 97 տարեկան մարդ է, այսպիսի հայասեր, այսպես սիրել Գյումրին․․․», ասաց քաղաքապետը։
Հիշեցնենք, որ «Օյունջյան» բարեգործական հիմնադրամը 20 տարիների ընթացքում շուրջ 7 միլիոնի ներդրում է ունեցել Գյումրիում։ Բժիշկը իր գործունեության ընթացքում կուտակածը ներդրել է հայրենիքի զարգացման համար։ Երկրաշարժից հետո մեծ բարերարը վերակառուցեց փլատակների վերածած թիվ 21 միջնակարգ դպրոցը, այնուհետ կառուցեց «Վարդուհի» արվեստի դպրոցը։
Դպրոց-վարժարանը կրում է ծնողների՝ Արմենակ և Եղիսաբեթ Օյունջյանների անունը, իսկ արվեստի դպրոցն ու արհեստի կենտրոնը՝ քույրերի՝ «Վարդուհի» արվեստի դպրոց և «Աղավնի» արհեստի կենտրոն։
Թուրքիայում ծնված ու ԱՄՆ-ում ապրած բարերարը բազմիցս հայտարարել է, որ ամեն ինչ անում է իր հայրենիքի ու ժողովրդի համար, որպեսզի հայ երեխաները չլքեն երկիրը, չգնան օտար ափեր, ծաղկեցնեն հայրենիքը։
«Աշխարհի ամենեն գեղեցիկ երկիրը մեր Հայաստանն է», – 2017թ․-ի սեպտեմբերին Գյումրի կատարած այցի ժամանակ ասել էր բարերարը։
Նունե ԱՐԵՎՇԱՏՅԱՆ
Հարգելի պարոն Բալասանյան, շատ ողջունելի է, որ բարերար Հովհաննես Օյունջյանը հերթական ներդրումն է անում Գյումրիում: 1989 թվականից մենք մեր գործունեությունն ենք իրականացնում թիթեղյա շինությունում, որը նվեր էր մեկ այլ բարերարի կողմից: Արդեն տևական ժամանակ է, ինչ ընթանում են խոսակցություններ քարաշեն փորձատեղի կառուցելու վերաբերյալ, սակայն առ այսօր դեռևս հստակեցված չէ, թե ինչ միջոցների հաշվին են իրականացվելու վերանորոգման աշխատանքները և քանի դեռ դրանք չեն սկսվել, մենք շարունակելու ենք աշխատել նույն վայրում:
Հարգանքներով՝ Գյումրու ժող. գործիքների պետական նվագախումբ: