Երեւան քաղաքի բնակիչ, 1981թ. ծնված Ռոման Կանդիլյանին մեղադրանք է առաջադրվել այն բանի համար, որ Վրաստանից ՀՀ իր ներմուծած միրգն ու բանջարեղենը չմաքսազերծելու եւ օրենքով սահմանված մաքսային վճարումները չկատարելու նպատակով, նա 2018թ. փետրվարի 10-ին գտնվելով Բագրատաշենի մաքսակետի տարածքում, մաքսակետի շարժական ուղեփակոցը կոտրելու եւ բեռն անարգելք դուրս հանելու միասնական դիտավորությամբ, այդ օրը ժամը 07.00-ի սահմաններում «Մերսեդես Բենց» մակնիշի ավտոմեքենայով չենթարկվելով ՀՀ ԿԱ ՊԵԿ Բագրատաշենի մաքսակետի մաքսային տեսուչի՝ կանգնելու օրինական պահանջին եւ շարժվելով դեպքի մաքսակետի ելք`հարվածել եւ կոտրել է մաքսակետի շարժական ուղեփակոցը եւ դուրս եկել մաքսակետի տարածքից, ՀՀ ԿԱ ՊԵԿ-ին պատճառելով 925 հազար դրամի վնաս:
Նրան մեղադրանք է առաջադրվել ՀՀ քրեական օրենսգրքի 185 հոդվածի 2-րդ մասի 2-րդ կետով (« Գույքը դիտավորությամբ ոչնչացնելը կամ վնասելը, որը խոշոր չափերի վնաս է պատճառել»): Նրա նկատմամբ խափանման միջոց է ընտրվել կալանավորումը:
Ռ. Կանդիլյանի դատավարությունը Տավուշի մարզի առաջին ատյանի դատարանում մեկնարկել է ապրիլի 18-ին: Նա միջնորդել է անցկացնել արագացված դատաքննություն, հայտարարելով, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված կարգով դատաքննություն անցկացնելու հետեւանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը միջնորդությունը բավարարել է: Դատարանը Ռ. Կանդիլյանի նկատմամբ պատիժ նշանակելիս հաշվի է առել, որ նա խոստովանել է մեղքը, անկեղծորեն զղջացել կատարածի համար, նախկինում ոչնչով արատավորված չէ, խնամքին են գտնվում մինչեւ 14 տարեկան երկու երեխաները:
Մայիսի 22-ին Իջեւան քաղաքում Տավուշի մարզի առաջին ատյանի դատարանի նախագահ Սամվել Մարդանյանը վճռել է Ռ. Կանդիլյանին մեղավոր ճանաչել ՀՀ քրեական օրենսգրքի 185 հոդվածի 2-րդ մասի 2-րդ կետով եւ նրան դատապարտել 6 ամիս ժամկետով ազատազրկման:
Ոսկան ՍԱՐԳՍՅԱՆ
