Հունիսի 1-ին Տավուշի մարզպետ նշանակվելուց հետո Վահե Ղալումյանը հանդիպել է մարզպետարանի աշխատակազմին, անցկացրել աշխատանքային խորհրդակցություն:
Մարզպետարանի ինտերնետային կայքից տեղեկանում ենք, որ նորանշանակ մարզպետը շեշտը դրել է մարզում ներդրումային եւ բիզնես ծրագրերի ներգրավման հարցերի վրա, նաեւ կարեւորել աշխատանքային կարգուկանոնի, ամբողջությամբ թափանցիկ աշխատելու հարցերը, նշելով, որ պատրաստ է քննարկել գործունեության արդյունավետությանն ուղղված՝ աշխատակիցների կողմից արվող ցանկացած առաջարկություն:
Մարզպետարանի ինտերնետային կայքում զետեղված լուսանկարներում երեւում են մարզպետարանի աշխատակիցների լարված հայացքները:
Վաղը՝ հունիսի 2-ին, ժամը 15-ին մարզպետարանում կկայանա Տավուշի մարզխորհրդի նիստ, քննարկվելու են մարզի համայնքների բյուջեների 2018թ. 5 ամսվա կատարողականի, մարզի գյուղատնտեսության մեջ 2017թ. կատարված աշխատանքների եւ 2018թ. հիմնախնդիրների մասին հարցերը:
Լուսանկարները՝ Տավուշի մարզպետարանի ինտերնետային կայքի
Ոսկան ՍԱՐԳՍՅԱՆ
