Երեւանի մամուլի ակումբի նախագահ Բորիս Նավասարդյանն այսօր լրատվամիջոցների հետ հանդիպմանը անդրադարձավ հայ-վրացական հարաբերություններում տեղի ունեցող ջերմացմանը:
«Շատ ոգեւորված եմ Նիկոլ Փաշինյանի գլխավորած պատվիրակության այցից Վրաստան: Ըստ իս, դա շատ խոստումնալից գործընթաց էր, որովհետեւ մեր երկրները զարգացման բավականին հետաքրքիր ընթացքում են գտնվում: Երկուսն էլ մեծ հավանականություն ունեն՝ դառնալ ժամանակակից եւ արագ զարգացող երկրներ: Եվ եթե Վրաստանը դա ապացուցում էր նախորդ տարիներին, Հայաստանը, մի տեսակ, ճահճացած, լճացած վիճակում էր գտնվում: Հիմա մենք թարմ օդ ենք տեսնում: Հայաստանի եւ Վրաստանի նմանությունն ակնհայտ է դառնում, եւ երկուսով ճանապարհ գնալն ավելի հեշտ է: Ինձ թվում է՝ Նիկոլ Փաշինյանի այցի հիմնական խորհուրդը հենց դա էր:
Հայաստանը պետք է միեւնույն ժամանակ վերլուծի Վրաստանի, ասենք, վերջին 15 տարի զարգացումները եւ խուսափի այն սխալներից ու խոչընդոտներից, որոնք եղել են հարեւան երկրի առջեւ: Վրաստանն էլ կարող է որոշակի դասեր քաղել Հայաստանի վերջին իրադարձություններից: Վերջին օրերին Վրաստանում տեղի ունեցող իրադարձությունների, դժգոհությունների, բախումներ պատճառն ըստ որոշ վերլուծաբանների այն է, որ վերջին տարիներին Վրաստանի իշխանությունները դադարել են զրուցել հասարակության հետ: Կարծում եմ, մեր իշխանությունները, որոնք հակված են խոսել ժողովրդի հետ, դա պետք է հաշվի առնեն, թեեւ գործերը շատ են եւ ժամանակը՝ քիչ:
Հայաստանի եւ Վրաստանի մեջ նմանություններն այնքան շատ են, որ նրանք պետք է միմյանց հետ մշտապես կոնտակտի մեջ լինեն, համատեղ խնդիրները քննարկեն: Իմ կարծիքով, Հայաստան-Վրաստան հարաբերություններում սկսվել է մեր հարաբերություններում խոչընդոտը հաղթահարելու այն գործընթացը, որ կա աշխարհաքաղաքական վեկտորի ընտրության տարբերության մեջ:
Կարծում եմ, հավասարակշռված քաղաքականությունը, որն իրականացնելուն հակված է այսօրվա Հայաստանը, կարող է այդ խոչընդոտն էլ վերացնել, երբ նախկին իշխանությունները հայտարարում էին, բայց երբեք չէին իրականացնում: Նկատի ունեմ տարբեր աշխարհաքաղաքական կառույցներում գտնվելը, որը նույնիսկ կարող է օգտակար լինել համագործակցության համար, մեկի հնարավորությունները նաեւ մյուսի շահերի համար կիրառել:
Մնում է՝ Հայաստանում այն, ինչ սկսվել է, շարունակվի, իսկ Վրաստանում իշխանությունները կարողանան հաղթահարել այսօրվա ջրբաժանը, որ ձեւավորվում է իշխանության եւ ժողովրդի միջեւ», – ասաց բանախոսը:
Աշոտ ՀԱԿՈԲՅԱՆ
