«Որդիս ինքնասպան չի եղել, նրան դաժանաբար սպանել են». մահացած զինվորի մայր

Նախորդ տարիներին եւ ամիսներին բանակում խաղաղ պայմաններում զոհված մի շարք զինծառայողների մայրեր այսօր կառավարության շենքի առաջ էին՝ Պաշտպանության նորանշանակ նախարար Դավիթ Տոնոյանին տեսնելու ակնկալիքով: Վերջինս, սակայն, այլ մուտքով էր հեռացել, եւ, սեւազգեստ մայրերից Իրինա Ղազարյանի պնդմամբ՝ շենքի ներսում գտնվելիս տեսել էր, որ պաստառներով մայրերն իրեն են սպասում: Ծնողները դժգոհեցին նրա վերաբերմունքից, ապա նախարարին, ինչպես եւ վարչապետ Նիկոլ Փաշինյանին պահանջ հղեցին՝ բանակը «մաքրել» այն սպաներից, որոնք բարոյահոգեբանական նվաստացուցիչ մթնոլորտում են պահում զինվորներին:

Արմենուհի Պողոսյանն Aravot.am-ին տեղեկացրեց, որ իր որդին`զինծառայող Լեւոն Թորոսյանը, մահացած է հայտնաբերվել մայիսի սկզբին: Ըստ տիկնոջ՝ քննիչները պնդում են, թե նա ինքնասպան է եղել, սակայն մայրը վստահեցնում է, որ որդուն դաժանաբար սպանել են. «Ամուսինս դիահերձարանում իր աչքով է տեսել, որ մեր տղայի սեռական օրգաններն ամբողջությամբ վնասված են եղել: Ձեռքերի վրա էլ են բռնության հետքեր եղել: Ասում են, թե նա ինքն է գնդացիրով ինքնասպան եղել: Լսո՞ւմ եք՝ գնդացիրով…դա սուտ է, նրան սպանել են»:

Հավելենք, որ քննության տվյալներով՝ Լեւոն Թորոսյանի մահվան գործով օրերս մեղադրանք է առաջադրվել մեկ կրտսեր սերժանտի:

Մանրամասն՝ տեսանյութերում:

https://www.facebook.com/aravot.am/videos/2009600342391804/%C2%A0?_rdc=1&_rdr

https://www.facebook.com/aravot.am/videos/2009614652390373/%C2%A0?_rdc=1&_rdr

Լուիզա ՍՈՒՔԻԱՍՅԱՆ