«Պետական թատրոնների նման քանակության կարիք չունենք, տասից ավելի պետական թատրոն ունենալն ավելորդ ճոխություն է Երեւանի համար: Հազիվ Սամվել Ալեքսանյանի հետեւից են ընկել…լավ է, որ ընկել են(կես-կատակով է ասում), բայց նման մշակութային խնդիրներ էլ կան»,-«Մեդիա կենտրոն»-ում այսօր լրագրողների հետ հանդիպմանը հայտարարեց դերասան Սերգեյ Դանիելյանը: Ոլորտի խնդիրների առնչությամբ նա նշեց. «Մշակույթի մեկենասների ինստիտուտը պետք է զարգանա: Մարդը կարող է հարկերից ազատվել, բայց թատրոն հովանավորել: Պետությունը «կթու կով» չի, որ ամեն տեղից փող տա»:
Դանիելյանի խոսքով՝ դերասաններ կան, որ տարիներով բեմ դուրս չեն գալիս, բայց աշխատավարձ են ստանում. «Դա նույնն է, թե «Սիթի»-ում ՀԴՄ չխփես: Սովետական փթած մտածելակերպ է ասելը, թե փող տվեք եւ հանճարեղ ներկայացում կանենք: Ոչ, հանճարեղ ներկայացում առանց փողի էլ հնարավոր է անել»:
Սերգեյ Դանիելյանն անդրադարձավ նաեւ վերջերս կայացած Նիկոլ Փաշինյան-մշակույթի գործիչներ հանդիպմանը՝ ասելով. «Ճիշտ չէ վարչապետից անընդհատ փող ուզելը: Մեկը լինի՝ վարչապետին փող տա»:
Լուիզա ՍՈՒՔԻԱՍՅԱՆ
