Սիրելի ծնողներ,
Ահա երեխաների պաշտպանության օրն է ու մտածում ենք ինչպես այս աշխարհում լավագույնս պաշտպանել մեր երեխաներին ամենայն չարից:
Հավատացեք, ավելի ապահով պաշտպանություն չկա, քան մեր երեխաներին տանենք Տեր Հիսուսի մոտ: Բարեպաշտ ծնողները սա միանգամից հասկացան ու Տեր Հիսուսի մոտ մանուկներ էին բերում, որպեսզի ձեռքը դնի նրանց վրա: Իսկ աշակերտները նրանց հանդիմանում էին, որ Հիսուսին նեղություն չտան: Երբ Հիսուսն այս տեսավ, բարկանալով սաստեց նրանց եւ ասաց. «Թո՛յլ տուէք այդ մանուկներին գալ ինձ մօտ եւ արգելք մի՛ եղէք նրանց, որովհետեւ Աստծու արքայութիւնը այդպիսիներինն է։ Ճշմարիտ եմ ասում ձեզ, ով Աստծու արքայութիւնը չընդունի որպէս մանուկ, նրա մէջ չի մտնելու»։ Եվ նա վերցնելով նրանց իր գիրկը՝ նրանց վրա ձեռքը դրեց եւ օրհնեց նրանց։
Սիրելի ծնողներ, թող Աստված շնորհներով զարդարի ձեզ եւ ձեր զավակներին: Ձեր ուսերին է դրված երեխաներին ընտանեկան ջերմությամբ, սիրով ու հոգատարությամբ դաստիարակելու առաքելությունն ու պատասխանատվությունը:
Դուք էլ ձեր երեխաներին տարեք Տեր Հիսուսի մոտ: Ավետարանը կարդացեք նրանց համար: Պատմեք նրանց Աստուծո մասին: Աղոթել սովորեցրեք: Համբերել սովորեցրեք: Սիրել ու ներել սովորեցրեք: Ծնողին հնազանդվել սովորեցրեք: Եկեղեցու ճամփեն սովորեցրեք: Ու Տեր Հիսուսը կգրկի ու կօրհնի նրանց: Եթե դուք էլ այդպես մանուկների պես լինեք, ձեզ էլ կգրկի ու կօրհնի Տերը: Ու չկա դրանից ավելի լավ բան:
Տերն օրհնի բոլորիս ընտանիքներին եւ խաղաղ ու սիրով լի մանկություն պարգեւի բոլոր երեխաներին:
ԱՐՄԵՆ ՀԱՐԵՅԱՆ
«Առավոտ»
01.06.2018
