Պաշտպանության նախարար Դավիթ Տոնոյանից լրագրողները հետաքրքրվեցին, թե hեղափոխության օրերին զորամասը ինքնակամ լքած խաղաղապահ զինվորների գործից ի՞նչ նորություն կա: Նախարարն ասաց, որ ծառայողական քննության արդյունքների հիման վրա որոշումները կկայացվեն: Պարոն Տոնոյանը նաեւ ասաց, որ քրեական հետապնդում նրանց նկատմամբ չկա:
Հարցին, թե նախարարի համար դատապարտելի՞ է զինվորականների՝ հեղափոխությանը միանալու քայլը, Դավիթ Տոնոյանը նկատեց. «Թույլ տվեք ավարտեմ ծառայողական քննությունը, այն արդեն մոտենում է ավարտին, ներկայացվել է գլխավոր շտաբ եւ կներկայացվի ինձ»:
Հարցին, թե Արցախի սահմանին ներկայումս կա՞ն ադրբեջանական զինուժի կուտակումներ, նախարարն ի պատասխան ասաց, որ այս պահին մտահոգիչ խնդիրներ չկան. «Ե՛վ պաշտպանական բանակի կողմից, ե՛ւ Հայաստանի Հանրապետության զինված ուժերի կողմից իրավիճակն ամբողջովին վերահսկվում է»:
Aravot.am-ը Դավիթ Տոնոյանից հետաքրքրվեց, թե հեղափոխության օրերին ադրբեջանական զինուժի կուտակումները Արցախի սահմանին, այնտեղ էլ մնացե՞լ են, թե հետ քայլ են արել, նախարարն իր պատասխան ասաց, որ այդ օրերին Ադրբեջանն ավելի շատ մտահոգված է եղել, որ մեր կողմից սադրանքներ կլինեն եւ այդ նպատակով էլ ուժերը կուտակել է:
Լուսինե ԲՈՒԴԱՂՅԱՆ
