«Լինելով համալսարանական շրջանավարտ, հիմա էլ դասախոս, ցավում եմ, որ մայր բուհի հետ կապված նման իրողություններ կամ գործընթացներ են ընթանում: Մի կողմ ենք թողնում յուրաքանչյուր կողմի վարքագիծը, ես մտահոգված եմ. դա պատիվ չի բերում բուհի կարգավիճակին»,-այսօր խորհրդարանում 2017 թվականի բյուջեի կատարողականի ժամանակ ասաց ԱԺ ՀՀԿ խմբակցության պատգամավոր պետական-իրավական եւ մարդու իրավունքների պաշտպանության հարցերի հանձնաժողովի փոխնախագահ Ռուստամ Մախմուդյանը: Պատգամավորը նկատի ուներ Երեւանի պետական համալսարանում տեղի ունեցած ցույցերը: Հարցն ուղղված էր ՀՀ մարդու իրավունքների պաշտպան Արման Թաթոյանին:
Արման Թաթոյանն ասաց, որ իրենք էլ են դիմում ստացել, ամենօրյա ռեժիմով էլ հետեւում են բուհում տեղի ունեցող իրադարձություններին: «Կրթական հաստատությունները պետք է զերծ մնան քաղաքական ազդեցությունից ու շահարկումներից` ցանկացած ժամանակ, երկակի ստանդարտներն էլ անընդունելի են: Սկզբունք պետք է լինի»:
Հիշեցրեց`այս տարի մարտին, ՄԻՊ զեկույցում կարմիր թելի նման առանձնացվում էր կրթական հաստատությունների, այդ թվում՝ բուհի քաղաքականացումը: Ուսանողներն, իհարկե, լիարժեք իրավունք ունեն բարձրացնել իրենց հուզող հարցերը, որոնք բուհի համապատասխան սուբյեկտների կողմից պատշաճ վերաբերմունք պետք է ստանան: «Բայց նաեւ, պետք է արձանագրել, որ յուրաքանչյուր հարց պետք է լուծվի իրավունքի շրջանակներում հատուկ մարմնի կողմից: Այս իրավիճակում չափազանց կարեւոր է իրավունքի գերակայության սկզբունքով գործել»,-ասաց Արման Թաթոյանը` հավելելով, որ ԵՊՀ-ում կարող են լինել խնդիրներ, որոնք պետք է քննարկվեն համապատասխան մարմինների կողմից. «Պնդումները՝ ռեկտորի թույլ տված անօրինականության մասին, պետք է անհապաղ ստուգում իրականացվի պատշաճ մարմիների կողմից: Իրավախախտում թույլ տված անձը պետք է պատասխանատվություն կրի»:
Մարդու իրավունքների պաշտպանը նաեւ կարծում է, որ մայր բուհի հեղինակության հետ կապված հարցն ուղիղ ազդում է կրթության վրա:
«Փաստ է, որ կարող են բուհում խնդիրներ լինել, ոչ մեկը չի քննարկում ու վիճարկում, որ ուսանողների պահանջներից կարող են արդարացի նույնպես լինել, բայց մեթոդաբանությունը, որ փորձում են ազդել, դա որեւէ մեկին պատիվ չի բերում: Այն, որ ԵՊՀ-ն քաղաքական շահարկումների թատերաբեմ են դարձրել, որևէ մեկին պատիվ չի»,-արձագանքեց Ռուստամ Մախմուդյանը:
«Այո, ԵՊՀ-ն արժեք է: Բայց այս իրավիճակը հետեւանք է նրա, որ նախկինում քաղաքական ազդեցության ներքո է եղել բուհը: Չքաղած դասերի հետեւանքն է, որ այսօր նման շահարկումներ ունենք: Բայց նաեւ արձանագրենք, որ չպետք է լինեն երկակի ստանդարտներ: Անթույլատրելի է ԵՊՀ-ի հայտարարությունը, թե ԵՊՀ-ն քաղաքական հետապնդումների է ենթարկվում, չպետք է նման հարց առաջանա: ԵՊՀ-ն կրթական հաստատություն է եւ կրթական հաստատությունը չի կարելի քաղաքականացնել, որ հետո ասել քաղաքական հետապնդման է ենթարկվում»,-եղավ Արման Թաթոյանի արձագանքը:
Նելլի ԳՐԻԳՈՐՅԱՆ
