Կառավարության նիստից առաջ Կոտայքի մարզպետի թեկնածու Ռոմանոս Պետրոսյանը պատասխանելով լրագրողների հարցին, թե իրեն կհաջողվի՞ Կոտայքի մարզը դուրս բերել ԲՀԿ առաջնորդ Գագիկ Ծառուկյանի ազդեցությունից, պատասխանեց, որ ինքը գործելու է ՀՀ Սահմանադրությամբ եւ օրենքներով, իրեն վերապահված լիազորությունների ու պարտավորությունների շրջանակներում. «Իմ թիվ մեկ առաջնահերթությունը Կոտայքի մարզում լինելու է Կոտայքի մարզի բնակչի վերափոխումը ՀՀ քաղաքացու»:
Մարզպետի թեկնածուից նաեւ հետաքրքրվեցին, թե հնարավո՞ր է նախորդ մարզպետի կատարած աշխատանքի մասով գործեր ուղարկվեն ԱԱԾ: Ռոմանոս Պետրոսյանն ասաց. «Բնականաբար, մարզի ընդհանուր իրողություններից եւ մարզում առկա քաղաքական կիրավիճակից ելնելով՝ որպեսզի համադրենք մեր քաղաքական կուրսը եւ կենտրոնական իշխանությունների ծրագիրը պրոյեկտենք մեր մարզին, կլինեն նաեւ ինչ-որ երեւույթներ, ՏԻՄ-երի կառավարման հետ կապված բացթողումներ: Դրանց, բնականաբար, կանդրադառնանք»:
Պարոն Պետրոսյանը նաեւ կարծիք հայտնեց, որ պետք է վերանայվի այն համայնքապետերի պաշտոնավարման հարցը, որոնք երկարատեւ, մի քանի շրջան ղեկավարում են, բայց նրանց համայնքներն այդպես էլ չեն զարգանում:
Արդեն կառավարության նիստում Ռոմանոս Պետրոսյանը նշանակվեց Կոտայքի մարզպետ:
Լուսինե ԲՈՒԴԱՂՅԱՆ
