Երեկ Մասիսի քաղաքապետ Դավիթ Համբարձումյանի եւ փոխքաղաքապետ Կարեն Օհանյանի ձերբակալությունից հետո Մասիսի քաղաքապետարանը հանդես եկավ հայտարարությամբ, որով ասվում էր, թե ձերբակալությունն իրավական հիմք չի ունեցել։ Հայտարարությամբ նաեւ կոչ է արվել մասիսցիներին՝ դուրս գալ բողոքի, ի պաշտպանություն քաղաքապետի։
Քիչ անց Մասիսի կենտրոնում հավաքվել են մարդիկ՝ մոտ 50 հոգի, որոնք հիմնականում քաղաքապետարանի ու դրա ենթակայության տակ գտնվող բյուջետային հիմնարկների աշխատակիցներն են եղել։ Եղել են նաեւ գրադարանի, թիվ 4 մանկապարտեզի աշխատակիցներ, որոնց, ըստ մեր աղբյուրի, տնօրեն Հայկուհի Հակոբյանն է ուղարկել ակցիայի։
Հակոբյանի ամուսինը ոստիկանության Մասիսի բաժնի աշխատակից Զորո Թամազյանն է, ով Հովտաշատի եւ Հայանիստի դեպքերի ժամանակ ներկա է եղել եւ կանխելու համար ոչինչ չձեռնարկելու պատճառով հայտնվել է իրավապահների «սեւ ցուցակում»։
Թիվ 5 ավագ դպրոցի տնօրենը, թեև չի խառնվել ոչնչի, բայց նրա աշխատակցուհի, դպրոցի ուսուցչուհի Մարիամ Առաքելյանը, գտնվելով մայրաքաղաքում, անձամբ զանգահարել է աշակերտներին եւ պարտադրել դուրս գալ ակցիայի։ Հանրահավաքի համար մարդիկ է «հավաքագրել» փոխքաղաքապետ Խորեն Արոյանը՝ անձամբ մտնելով մարդկանց տները եւ համոզելով դուրս գալ փողոց:
Հեղինե ՄԱՆՈՒԿՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
