Երեկ «Մոսկվա» կինոթատրոնի դիմաց` Շառլ Ազնավուրի հրապարակում, լոռեցի երեխաներն իրենց ձեռքով պատրաստված իրերի ցուցահանդես-վաճառք էին կազմակերպել: Ասացին, որ գումարը հավաքում են իրենց դասընկերոջ կյանքը փրկելու համար: Նրանց ընկերը հիվանդ է:
Մեր երկրում, որտեղ արդեն որերորդ տարին բյուջեն հռչակվում է սոցիալական, լուրջ հիվանդություններով երեխաները հիմնականում բուժվում են բարեգործական միջոցներով, դրամահավաքներով: Այսինքն` երեխաների կյանքը կախված է բարերարներից: Բարեգործությունը վատ բան չէ, հատկապես, որ դրանք կատարում են երեխաները` իրենց արդար քրտինքով վաստակած գումարներով: Այն երեխաների մեջ բարություն, շրջապատի հանդեպ հոգատարություն ու մարդասիրություն է զարգացնում:
Եթե մենք նոր Հայաստան ենք կերտում, հատկապես երեխաների առողջության մասով հատուկ մոտեցում ու պատասխանատվություն պետք է ունենանք, լուծումներն էլ լինեն ոչ թե բարերարների ձեռքում, այլ համակարգային:
Բոլորովին վերջերս լուրջ ցնցումների ենթարկվեցին Արյունաբանական կենտրոնում բուժվող երեխաներն ու նրանց ծնողները, որոնց բուժումը հիմնականում կատարվում է բարեգործների միջոցներով: Երկրում տեղի ունեցած փոփոխությունները ռիսկի տակ դրեցին նաեւ քաղցկեղով հիվանդ փոքրիկների բուժումը:
Լուսանկարը` ԼՈՒՍԻՆԵ ԲՈՒԴԱՂՅԱՆԻ
«Առավոտ»
01.06.2018
