«Իմ քայլը» ժողովրդական շարժումը, կարծում եմ, հասարակության մեջ կուտակված դժգոհության արդյունքն էր, որը ստիպեց փողոց դուրս գալ եւ պայքարել: Իմ գնահատմամբ, սակայն, հայ հասարակությունը դեռեւս չգիտի, թե նոր իշխանության քաղաքականությունն ապագայում ինչ արդյունք կունենա»,-«Լուսավոր Հայաստան» կուսակցության այսօր կազմակերպած քննարկման ժամանակ, որի ընթացքում ներկայացվում էր հեղափոխությունների միջազգային փորձը, Aravot.am-ի եւ «Հանրային ռադիո»-ի հետ զրույցում ասաց ԱՄՆ-ից ժամանած տնտեսագետ Դանիել Միթչելը:
«Իմ ցանկությունն է, որ Հայաստանը վերածվի տարածաշրջանային «առյուծի», ինչպես, օրինակ, Չիլին՝ Լատինական Ամերիկայում: Հայաստանը պետք է տնտեսական աճի մեծ ցատկ անի, բայց այս պահին պարզ չէ, թե դա որքանով կհաջողվի: Ինչպես գիտենք, ամերիկահայ համայնքի շատ ներկայացուցիչներ հաջողակ ձեռնարկատերեր են: Այս փաստից ենթադրում եմ, որ եթե Հայաստանն արդյունավետ տնտեսական քաղաքականություն վարի, բնակչությունը կկարողանա օգուտներ քաղել դրանից»,-համոզմունք հայտնեց փորձագետը:
Թե ՀՀ-ի՝ նոր իշխանություն ունենալու փաստն ինչպես կազդի հայ-ամերիկյան հարաբերությունների վրա, Միթչելը խուսափեց գնահատականներ տալ, միայն նշեց. «Տպավորությունս այն է, որ Վաշինգթոնում հայ-ամերիկյան հարաբերություններին առնչվող ամենահնչեղ հարցը Հայոց ցեղասպանության ճանաչման քարոզչությունն է, որը միաժամանակ կարող է ազդել թուրք-ամերիկյան հարաբերությունների վրա»:
Լուիզա ՍՈՒՔԻԱՍՅԱՆ
