Ադրբեջանի նախագահ Իլհամ Ալիևը անցած ուրբաթ երկրի անկախության 100-ամյակի կապակցությամբ համաներում է շնորհել 634 բանտարկյալի, որոնցից միայն 1-ին են իրավապաշտպանները համարում քաղբանտարկյալ: Ինչպես գրում է Human Rights Watch միջազգային իրավապաշտպան կազմակերպության կայքը, համաներման է ենթարկել մի քանի կրոնական ակտիվիստ և ընդդիմադիր կուսակցության անդամներ, որոնց ընդամենը մի քանի օր էր մնում ազատ արձակվելու համար: Անազատության մեջ շարունակում են մնալ տասնյակ նշանավոր քաղաքացիական և քաղաքական ակտիվիստներ, բլոգերներ և լրագրողներ, այդ թվում՝ Մեհման Հուսեյնովը, Աֆգան Մուխթարլը, Իլգար Մամադովը և այլք:
Ադրբեջանցի պաշտոնյաները Ալիևի կողմից ստորագրված հրամանագիրն ամիսներ շարունակ օգտագործել են մարդու իրավունքների հետ կապված իրավիճակի վերաբերյալ քննադատությունները շեղելու համար՝ ակնկալելով որոշակի արդյունքներ:
Բայց համաներումից հետո էլ քաղբանտարկյալները շարունակում են ճաղերի հետևում մնալ՝ փաստում են իրավապաշտպանները և ընդգծում, որ Եվրամիությունը պետք է լրացուցիչ ճնշումներ գործադրի Ադրբեջանի վրա՝ նրանց ազատ արձակմանը հասնելու համար:
«Այս ակտիվիստները ակնկալում էին, որ Ալիևի համաներումը նրանց ազատություն կշնորհի, որը նրանցից խլել են անարդարացիորեն՝ ակտիվիստական գործունեության պատճառով: ԵՄ-ն պետք է այժմ միաձայն պնդի, որ նրանք ազատ արձակվեն, իսկ Ադրբեջանը դադարեցնի բռնաճնշումները նրանց հանդեպ»,- ասվում է իրավապաշտպան կազմակերպության հայտարարության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
