Մենք «Ղարաբաղ տելեկոմ» ընկերության հետ ձեռք ենք բերել պայմանավորվածություն, որ եթե լինեն նոր ներդրողներ, ապա իրենք պատրաստ կլինեն վաճառել ընկերությունը, և այդ գումարը ներդնել Արցախում գյուղատնտեսության բնագավառում: Իսկ վաճառքը կիրականացվի միջազգային գնահատող կազմակերպության գնահատման արդյունքում ձևավորված գնի առնվազն 10 տոկոս զեղչով: Այս մասին այսօր հրավիրած մամուլի ասուլիսի ժամանակ հայտնել է Արցախի պետնախարար Արայիկ Հարությունյանը:
«Ղարաբաղ տելեկոմ»-ը տվել է իր համաձայնությունը ներդրումներ կատարել կապի որակի բարելավման ուղղությամբ և ներկրել համապատասխան սարքավորումներ: Սակայն հենց նոր հայտնի դարձավ, որ առաջացել են քաղաքական խնդիրներ, քանի որ այն համաշխարհային նշանակության ընկերությունը, որից պետք էձեռք բերվեն սարքավորումները, ունի համապատասխան տեղեկություններ, որ այդ սարքավորումները պետք է ներդրվեն Արցախում և արդեն փորձում է խուսափել ու հրաժարվել»,- նշեց Ա. Հարությունյանը:
Նա ասաց, որ այսօր պաշտոնապես կդիմի Հայաստանում կապի երեք օպերատորներին, առաջարկելով, Արցախի տարածքում հեռահաղորդակցության ծառայությունների մատուցման բնագավառը մրցակցային դարձնելու, ազատականացնելու և ավելի զարգացնելու նպատակով, համապատասխան ծրագիր, ներդրումներ և ծառայություններ ներկայացնելու միջոցով, իրականացնել հեռահաղորդակցության ծառայությունների մատուցում Արցախում:
Դավիթ ԱԲԱՂՅԱՆ
