Այսօր Արցախի պետնախարար Արայիկ Հարությունյանը հրավիրել է մամուլի ասուլիս` պատասխանելու «Ղարաբաղ տելեկոմ» ընկերության ընդհանուր քաղաքականության մասին վերջին զարգացումների վերաբերյալ հարցերին և տեղեկացնել առաջարկվող լուծումների մասին: Շարժառիթը` վերջին օրերին Արցախի քաղաքացիների շրջանում ընդգծված դժգոհություններն են` պայմանավորված «Ղարաբաղ տելեկոմ» ընկերության մենաշնորհի և թանկ ու անորակ կապի առկայությամբ:
Պատասխանելով Aravot.am-ի հարցին, թե այս օրերին Արցախում «Ղարաբաղ տելեկոմ»-ի դեմ քաղաքացիների դժգոհությունները և բարձր սակագների ու մենաշնորհի դեմ պայքարի կոչերը համարո՞ւմ է հայաստանյան վերջին իրադարձությունների ազդեցության հետևանք, պետնախարարը պատասխանեց, որ ոչ. «Դժգոհություններ այս առումով միշտ էլ եղել են և բազմիցս այս դահլիճում, Ազգային ժողովում և այլ շրջանակներում բարձրացվել են»:
Արայիկ Հարությունյանի խոսքով` Արցախում ցանկացած ներդրողներին առաջին հերթին ոչ միայն պետք է երաշխավորել բիզնեսի արդյունավետություն, շահութաբերություն, այլ նաև քաղաքական պաշտպանություն, որովհետև ներդրողները դրսում ենթարկվում են տարբեր ճնշումների միջազգային հարթություններում և իրենց երկրներում:
«Բայց եթե հասկանում ենք, որ կա տարբերություն ՀՀ տվյալ ծառայությունների գնի և որակի հետ համեմատ, ապա օբյեկտիվ հիմնավորված բողոք կա մեր երկրում, որի համար մենք աշխատում ենք: Այսօր այն դժգոհությունները, որոնք առկա են մեր քաղաքացիների շրջանում, իհարկե, հիմնավորված են, բայց մենք պետք է հաշվի առնենք, որ Արցախը ունի իր առանձնահատկությունները և բազմաթիվ հիմնավորումներ ու բացատրություններ մենք ներկայացրել ենք` սակագների ձևավորվման վերաբերյալ»,- ասաց Ա. Հարությունյանը:
Պետնախարարը նշեց, որ կա հնարավորություն ոչ միայն վարչակագրական, այլ նաև հարկային ստուգումների ընթացքում «Ղարաբաղ տելեկոմ»-ի հաշվետվություններում տեսնել ստացած շահույթը և ընդհանուր ֆինանսական հոսքերը :
«Վստահեցնում եմ, որ ոչ մի «թալան» չի իրականացվել, այլ հակառակը, մեր բոլոր ներդրողների մեջ «Ղարաբաղ տելեկոմ»-ը ստացել է ամենաքիչ եկամտաբերություն», շեշտեց պետնախարարը:
Դավիթ ԱԲԱՂՅԱՆ
