Հայաստանում կա շահագործման թույլտվություն ունեցող 28 հանք: Դրանց մի մասն իրականում չի աշխատում: Այսօր այդ մասին խորհրդարանում լրագրողների հետ զրույցում ասաց ՀՀ բնապահպանության նախարար Էրիկ Գրիգորյանը: Հիշեցնենք, հանքարդյունաբերության ոլորտում լայնածավալ ստուգումներ սկսելու մասին օրերս հայտարարեց վարչապետ Նիկոլ Փաշինյանը: Ստուգումներն իրականացնելու է Բնապահպանական եւ ընդերքի տեսչական մարմինը:
«Երբ հանքարդյունաբերական կազմակերպությունը ստանում էր շրջակա միջավայրի վրա ազդեցության գնահատականը դրական, դրանից հետո գործունեությունը մոնիթորինգի կամ ստուգման պետք է ենթարկվեր: Մոնիթորինգի համակարգը հստակեցված չէր, թե ո՞նց պետք է արվի, ստուգումներն էլ դադարեցված էին»,- ասում է նախարարը:
Լրագրողները հետաքրքրվեցին նաեւ`նոր կառավարության ծրագրում կա՞ օֆշորային գոտիներում գրանցված ընկերությունների գործունեությունը դադարեցնելու ծրագիր: Նախարարն ասաց, որ դա ֆինանսական ոլորտի հարց է:
Մանրամասները` տեսանյութում
Լրագրողները հետաքրքրվեցին`ստուգումների ժամանակ տարբերակում լինելո՞ւ է: Ասենք, Գագիկ Ծառուկյանին պատկանող հանքում ստուգումներ լինելո՞ւ են: Նախարարը զարմացավ. «Բայց ի՞նչ կապ ունի: Այսօրվա դրությամբ մինչեւ այս ամեն ինչը նույն Գագիկ Ծառուկյանին պատկանող ոսկու հանքի շրջակա միջավայրի վրա փորձաքննության գործընթացը դադարեցվել է, այսինքն` անունը, ով է, ինչ է, ի՞նչ կապ ունի: Կա օրենք»:
Այլ մանրամասները` տեսանյութում
Նելլի ԳՐԻԳՈՐՅԱՆ
