Դատավոր Վաչե Մարգարյանի նախագահությամբ այսօր նախկին դատավոր Իշխան Բարսեղյանի գործով հերթական դատական նիստն էր: Հիշեցնենք, որ Բարսեղյանը մեղադրվում է 2016թ. քաղաքացի Նորիկ Հակոբյանի օգտին դատավճիռ կայացնելու համար նրանից միջնորդի միջոցով հազար ԱՄՆ դոլարի չափով կաշառք պահանջելու եւ ստանալու համար: Փաստաբան Էլզա Զաքարյանը եւս այս գործով մեղադրյալի աթոռին է. նրան մեղադրանք է առաջադրվել այն բանի համար, որ նա կատարել է կաշառքի միջնորդությունը: Այսօրվա նիստում մեղադրող-դատախազ Կարեն Բիշարյանն ընթերցեց մեղադրական ճառը: Նա համոզմունք հայտնեց, որ ըստ գործում առկա նյութերի՝ Իշխան Բարսեղյանի եւ Էլզա Զաքարյանի մեղավորությունը հաստատված է:
Դատախազը դատարանից պահանջեց Բարսեղյանին մեղավոր ճանաչել եւ դատապարտել ութ տարվա ազատազրկման, իսկ Զաքարյանին՝ ազատել քրեական պատասխանատվությունից: Վերջին փաստը Կարեն Բիշարյանը պատճառաբանեց նրանով, որ Էլզա Զաքարյանն առաջին անգամ է միջին ծանրության հանցանք կատարել, ինքնակամ ներկայացել է իրավապահ մարմիններին եւ օժանդակել հանցագործության բացահայտմանը: Իշխան Բարսեղյանը դատախազի մեղադրական ճառը լսելուց հետո թեթեւակի ժպտաց:
Հիշեցնենք, որ Իշխան Բարսեղյանը 1999 թվականից Երևանի ընդհանուր իրավասության դատարանի դատավոր էր: Նրա պաշտպանական ճառը կլսվի առաջիկա նիստերում, ինչից հետո դատավորը կկայացնի դատավճիռը: Առաջիկա նիստը հունիսի 7-ին է՝ 14 00-ին:
Լուիզա ՍՈՒՔԻԱՍՅԱՆ
