«Իդեալական կլիներ, եթե որեւէ արտոնություն որեւէ մեկը չունենար, բայց արտոնություն չտրամադրելն էլ մյուս ծայրահեղությունն է»,- խորհրդարանում լրագրողների հետ զրույցում ասաց ՀՀ ֆինանսների նախարար Ատոմ Ջանջուղազյանն՝ անդրադառնալով գյուղմթերքների դիմաց 20 տոկոսի փոխարեն 5 տոկոս հարկելու նախկին իշխանությունների եւ գործարարների միջեւ եղած պայմանավորվածությանը։
Լրագրողները հետաքրքրվեցին`հնարավո՞ր է գների բարձրացում լինի, եթե գյուղմթերքի մասով սկսի գործել 20 տոկոս հարկաչափը: «Եթե կարող եք պնդել, որ գյուղմթերքի գնի վրա ազդող միակ գործոնը հարկն է, ապա ՝ այո, կարող է։ Բայց դա միակ գործոնը չէ, որը կանխորոշում է գնի փոփոխությունը։ Կարող է բերել, կարող է չբերել`կախված է նրանից, թե մնացած գործոններն ինչ ազդեցություն կունենան»։
Հստակեցնող հարցին` ի սկզբանե ՊԵԿ-ի հետ պայմանավորվածություն էր ձեռք բերվել 5 տոկոս հարկել, որպեսզի գնա՞ճ չլինի, Ատոմ Ջանջուղազյանը պատասխանեց, որ պայմանավորվածությունը վերաբերել է փաստաթղթավորմանը։
Հարցին`մտավախություն չկա՞, որ այս ամենի արդյունքում Հայաստանից կապիտալի արտահոսք տեղի կունենա, Ատոմ Ջանջուղազյանը պատասխանեց. «Եթե հարցը անօրինական գործողությունների դադարեցման արդյունքում ինչ- որ երեւույթների տեղի ունենալուն է վերաբերում, ապա թող տեղի ունենա: Ավելի ճիշտ է անօրինականություն չլինի, նույնիսկ եթե դա այն գինն է, որը պետք վճարվի: Կգա հաստատ այն կապիտալը, որը նախընտրում է աշխատել օրինական դաշտում»։
Այլ մանրամասները՝ տեսանյութում
Նելլի ԳՐԻԳՈՐՅԱՆ
