«Այս պահին առանձին դատական գործերին գնահատականներ տալ չեմ կարող, բայց, այո, կան քաղբանտարկյալներ»,-Aravot.am-ի եւ «Հանրային ռադիոյի» հետ զրույցում այսօր անդրադառնալով կարծիքներին, թե աշնանը սպասվելիք խորհրդարանական ընտրությունները քաղբանտարկյալների առկայության պայմաններում լեգիտիմ չեն լինի, ասաց ԱԺ «Ելք» խմբակցության պատգամավոր Էդմոն Մարուքյանը: «Դատարաններին պետք է ազատ թողնել: Միջամտություն չպետք է լինի»,-համոզմունք հայտնեց նա:
Մարուքյանը կարծիք հայտնեց, որ դատարանները, որպես ինքնակառավարվող իշխանության մի ճյուղ, իրենց իսկ գործունեությամբ կուղղեն առկա սխալները. «Կարծում եմ՝ մինչեւ ընտրություններ մենք այդ խնդիրները լուծած կլինենք»: Պատգամավորի խոսքով՝ նոր իշխանությունը դատարաններին հրահանգներ չի իջեցնելու. «Այն անձանց, որոնք դատապարտված են, վարչապետը եւ նախագահն իրավասու են ներում շնորհել: Իսկ ովքեր դեռ դատապարտված չեն, պետք է սպասենք դատավարությունների ավարտին: Կարծում եմ՝ կլինեն արդարացումներ»:
Դառնալով այն փաստին, որ վերջին շրջանում որոշ անձանց կալանքից ազատումներ եղան, Մարուքյանն ընդգծեց՝ դա նշանակում է, որ դատարանները սկսել են գործել ու շնչել. «Դատարանները պետք է առաջնորդվեն բացառապես օրենքով՝ առանց միջամտության»:
Լուիզա ՍՈՒՔԻԱՍՅԱՆ
