Այսօր Արցախի խորհրդարանում մեկնարկեց յոթերորդ նստաշրջանի հերթական լիագումար նիստը: Մինչ օրակարգային հարցերին անդրադառնալը` խորհրդարանի նախագահ Աշոտ Ղուլյանը շնորհավորեց ներկաներին` մայիսյան տոների առթիվ, ընդգծելով, որ պատմության տարբեր ժամանակահատվածներում հայության համար բախտորոշ և վճռական հաղթանակներ եղել են հենց մայիս ամսում, որոնք վճռական են եղել ազգային ինքնության պահպանման և սեփական ճակատագիրը տնօրինելու տեսանկյունից:
Նիստի օրակարգում առաջինը Գերագույն և վերաքննիչ դատարանների դատավորներ նշանակելու մասին հարցն էր:
Նոր Սահմանադրության համաձայն` շարունակելով խորհրդարանում դատավորների ընտրության կարգը Բարձրագույն դատական խորհրդի նախագահը ներկայացրեց վերաքննիչ դատարանի դատավոր Հրայր Աբրահամյանի թեկնածությունը` Գերագույն դատարանի դատավորի թափուր պաշտոնում նշանակելու համար, իսկ վերաքննիչ դատարանի դատավորի պաշտոնում`ընդհանուր իրավասության առաջին ատյանի դատավոր Մարատ Ավանեսյանի թեկնածությունը:
Փակ գաղտնի քվեարկությամբ առաջադրված երկու թեկնածուններն էլ ընտրվեցին համապատասխան պաշտոններում:
Նիստի օրակարգի հարցերից էր Մարդու իրավունքների պաշտպան Ռուբեն Մելիքյանի տարեկան հաղորդումը` Մարդու իրավունքների պաշտպանի 2017 թ. գործունեության, ինչպես նաև մարդու իրավունքների և ազատությունների պաշտպանության վիճակի մասին:
Ռուբեն Մելիքյանը 2017 թվականը հաստատության համար որակեց բավականին հագեցած տարի և բավական կարևոր` Արցախում մարդու իրավունքների պաշտպանության տեսանկյունից:
«2017 թվականին 150 անձից ստացել ենք 119 դիմում (թվերի տարբերությունը պայմանավորված է կոլեկտիվ դիմումներով), ինչը 2016 թվականի համեմատ գրեթե նույնն է: Դիմումներում մեծ կշիռ ունեն սոցիալական ապահովության, բավարար կենսամակարդակի ապահովման և աշխատանքային իրավունքների հետ կապված դիմումները: Բավական ակտիվ ենք եղել միջազգային շփումներում, մի քանի միջազգային այցեր ենք ունեցել, որոնք թիրախավորել ենք երեք ուղղություններով. տեղեկատվության մատուցում և կապերի հաստատում միջազգային կազմակերպությունների հետ, միջազգային կառույցներում ներկայացվածություն և սփյուռքյան կառույցների հետ աշխատանքը»,- նշեց Ռ. Մելիքյանը:
Նա ընդգծեց, որ հաշվետու տարում իրենց կարևորագույն խնդիրը շարունակում է մնալ 2016 թ. ապրիլին Ադրբեջանի ագրեսիայի հետևանքով գրանցված մարդու հիմնարար իրավունքների զանգվածային խախտումների անբավարար միջազգային արձագանքը:
Պատասխանելով պատգամավորների հարցերին Ռ. Մելիքյանը ասաց, որ իրենք քաղաքական հայացքների վերաբերյալ հետապնդումների մասով որևէ դիմում չեն ստացել:
Ինչ վերաբերում է 2016 թվականի ապրիլին ադրբեջանական ագրեսիայի հետևանքով գրանցված խախտումների վերաբերյալ, անբավարար միջազգային արձագանքներին, ապա Ռ. Մելիքյանը նշեց, որ դեռևս ակնկալիքներ ունեն, բայց լավատեսությունը չափազանց մեծ չէ` հաշվի առնելով ժամանակային և քաղաքական գործոնները:
Դավիթ ԱԲԱՂՅԱՆ
