Քիչ առաջ դատավոր Արտուշ Գաբրիելյանը բավարարեց «Սասնա ծռերի» գործով ամբաստանյալներից Խաչատուր Գիչյանի խափանման միջոց կալանք փոխելու, այսինքն, նրան ազատ արձակելու միջնորդությունը։ Ըստ այդմ, 71-ամյա Գիչյանը կայանքից կազատվի, իսկ նրա հանդեպ որպես խափանման միջոց կընտրվի ստորագրությամբ երկրից չհեռանալը։
Միջնորդության բավարարման հիմքում այսօր դատարանում ընթերցված դատաբժշկական փորձաքննություն արձանագրությունն էր, համաձայն որի՝ Գիչյանը մեկ տասնյակից ավելի հիվանդություններ ունի։
Հիշեցնենք, որ նա այն բեռնատարի սեփականատերն է, որով «Սասնա ծռեր» խմբավորման անդամները ներխուժել էին ՊՊԾ գունդ, եւ մեղադրվում է զինված խմբին օժանդակելու համար։ Իր պնդմամբ, նա չի իմացել, թե ինչ նպատակով են պատրաստվել օգտագործել իր բեռնատարը։
«Սասնա ծռերի» գործով կալանքից ազատված առաջին ամբաստանյալը, հիշեցնենք, Կարո Եղնուկյանն է։
Լուիզա ՍՈՒՔԻԱՍՅԱՆ
