Քաղաքացիական ակտիվիստ Տիգրան Մազմանյանն այսօր սոցցանցի իր էջում հետեւյալ գրառումն է կատարել. «Վերացվեց իմ հանդեպ կիրառված խափանման միջոցը: Դրան կհաջորդի քրեական գործի կարճումը»:
Հիշեցնենք, որ Տիգրան Մազմանյանը ձերբակալվել էր ապրիլի 17-ին. նա կասկածվում է զանգվածային անկարգությունների ժամանակ բռնություն գործադրելու, ջարդ կամ հրկիզում իրականացնելու, գույք ոչնչացնելու կամ վնասելու համար: Ապրիլի 14-ին նա ցուցարարների թվում ներխուժել էր Հանրային ռադիոյի շենք. այդ ընթացքում կոտրվել էր ռադիոյի դռներից մեկը: Վերջերս նրա խափանման միջոց կալանքն էր փոխվել, եւ նա ազատ էր արձակվել: Aravot.am-ի հետ զրույցում Տիգրան Մազմանյանի փաստաբան Արա Ղարագյոզյանը հստակեցրեց, որ այսօր վերացվել է նաեւ Մազմանյանի՝ ստորագրությամբ երկրից չհեռանալու խափանման միջոցը:
«Պատրաստվում ենք բարձրաձայնել Տիգրան Մազմանյանի հանդեպ կալանքի որոշում կայացրած դատավորին պատասխանատվության ենթարկելու հարցը: Նույնը վերաբերում է նաեւ այն ոստիկանին, որի կեղծ ցուցմունքի հիման վրա կալանավորվել է Մազմանյանը: Օրերս վերաքննիչ դատարանը ճանաչեց, որ կալանքն իրավաչափ չի եղել: Հուսով ենք, որ շուտով քրեական գործն էլ կկարճվի»,-համոզմունք հայտնեց Արա Ղարագյոզյանը
Թե ինչն է վստահության հիմքը, թե քրեական գործը կկարճվի եւ արդյոք Հանրային ռադիոն է հետ վերցրել իր բողոքը, Արա Ղարագյոզյանը նշեց՝ նման բան չկա. «Պարզապես խնդիրն այն է, որ զանգվածային անկարգություններ՝ ջարդ, հրկիզում չի եղել, այդ մեղադրանքը շինծու է: Մազմանյանը նման գործողություններ չի կատարել: Ճիշտ է, մուտք են գործել ռադիոյի շենք, բայց զանգվածային անկարգություններ չեն եղել»:
Փաստաբանը նշեց, որ այս պահին հստակ տեղեկություններ չկան քրեական գործի կարճման մասին, բայց իրենք ենթադրում են, որ այդպես կլինի. «Հիմա իշխանություն է փոխվել, իսկ այդ գործը նախորդ իշխանությունների օրոք է հարուցվել՝ ապօրինի կերպով: Ցուցարարների գործողությունները խաղաղ բնույթ են կրել»:
Լուիզա ՍՈՒՔԻԱՍՅԱՆ
