Առաջին պաշտոնական այցով Վրաստանում գտնվող ՀՀ վարչապետ Նիկոլ Փաշինյանն այսօր այցելեց նաեւ Թբիլիսիի հայ գրողների եւ հասարակական գործիչների «Խոջիվանք» պանթեոն, որտեղ ամփոփված է Ամենայն հայոց բանաստեղծ Հովհաննես Թումանյանը:
Վարչապետը ծաղիկներ խոնարհեց Թումանյանի շիրմին, ապա մի քանի վայրկյան ծնկի իջավ՝ ձեռքը դրած շիրմաքարին:
«Հովհաննես Թումանյան անուն-ազգանունն ինքնին ստեղծագործություն է եւ մեր ժողովրդի գիտակցության ամենաբարձր կետերից մեկը»,-լրագրողների հետ զրույցում մեծն հայի մասին այսպիսի կարծիք հայտնեց նա:
Ապա` Փաշինյանն ամփոփեց իր առաջին ճանաչողական այցը Վրաստան՝ այն դրական գնահատելով. «Ի դեմս Վրաստանի նախագահի, վարչապետի եւ ԱԺ նախագահի՝ ձեռք բերեցի լավ բարեկամների: Համոզված եմ, որ մեր երկրների հարաբերությունները կզարգանան այդ բարեկամությանը համահունչ»:
Լրագրողները հետաքրքրվեցին, թե արդյոք Վրաստանի ղեկավարության հետ քննարկվել է Լարսի անցակետի այլընտրանքի հարցը:
Նիկոլ Փաշինյանը պատասխանեց. «Պայմանագրերը ստորագրված են: Հուսամ՝ այդ ծրագիրը հնարավորինս շուտ կգործարկվի: Առհասարակ, բոլոր հարցերը քննարկել ենք»:
Լուիզա ՍՈՒՔԻԱՍՅԱՆ
