Երեւանի փոխքաղաքապետ Կամո Արեյանն այսօր Երեւանի քաղաքապետարանի ավագանու նիստին անդրադարձավ հորդառատ անձրեւից հետո մայրաքաղաքում առաջացած հսկայական ջրափոսերին, որոնք հանրության դժգոհությունն են առաջացրել: Մարդիկ մեղադրում են քաղաքապետարանի աշխատակազմին, որ ջրահեռացման աշխատանքները լավ չեն կատարում:
Արեյանը հստակեցրեց՝ այդ գործառույթը կառավարությունը հանձնել է «Վեոլա ջուր» ընկերությանը, որը ջրմուղի հետ պայմանագիր ունի կնքած:
Արեյանը վստահեցրեց, որ ջրատար խողովակները փոխված են եւ նորոգված, եւ քաղաքապետարանը պատասխանատվություն չի կրում ջրափոսերի առաջացման համար:
«Կա մասնագիտական հստակ գնահատական՝ ինչքան բարեկարգվում է քաղաքը, այնքան մեծանալու է մակերեւութային ջրերի քանակը. Բակեր, մայթեր, պուրակներ, գրունտային տարածքները ինչքան ասֆալտապատվում են, այնքան անձրեւաջրերը տեղ չունեն ներծծվելու: Դրանք դառնում են մակերեւութային ջրեր եւ անցնում անձրեւատար համակարգով»,-ասաց փոխքաղաքապետը:
Նա նաեւ նկատեց՝ ինչո՞ւ մարդիկ չեն դժգոհում, որ եվրոպական այլ քաղաքներում էլ հորդառատ անձրեւներից հետո նման հսկայական ջրափոսեր են լինում:
Մանրամասները՝ տեսանյութում:
Նելլի ԲԱԲԱՅԱՆ
