Հայաստանի ամենամեծ ձեռակերտ թանգարանը գտնվում է Կոտայքի մարզի Առինջ գյուղում: Այն փորել է Առինջի բնակիչներից Լևոն Առաքելյանը՝ քսաներեք տարի շարունակ: Ցավոք սրտի նա հիմա չկա: Թանգարանի մասին պատմում է կինը ՝Տոսյա Առաքելյանը:
Ներկայիս հոյակերտ քարանձավը սկզբում ընդամենը կարտոֆիլի համար նախատեսված հոր է եղել, որը փորելու ընթացքում Լևոն Առաքելյանը շատ երազներ ու տեսիլքներ է ունեցել, որոնք էլ պատճառ են հանդիսացել փոքրիկ հորը վերածելու մեծ թանգարանի:
Թանգարանը փորելու համար Լևոն Առաքելյանն իր կյանքի մի մասն է ծախսել, ընդ որում՝ այդ ամենն արել է միայնակ: Քառասունչորս տարեկանից ընտանիքի հոգսերը հանձնել է իր կնոջը և սկսել փորել: Նա էլ սկզբում չի իմացել թե ինչ է ստեղծել՝ կամ ստեղծելու, փորել է ինքնամոռաց ու ստեղծել հրաշք: Մահացել է անմիջապես գործն ավարտելուց հետո:
Այս ձեռակերտ հրաշքը սկզբում միայն իր ընտանիքի համար էր նախատեսված: Ընդհանուր մակերեսը 280ՔՄ է, ունի 21 մետր խորություն և 6 սենյակ: Լևոն Առաքելյանը պահպանել է բոլոր ա´յն կանոնները, որոնք անհրաժեշտ են օդափոխության համար, որի արդյունքում թանգարանի ներսում տարվա չորս եղանակներին էլ 10°C տաքություն է: Թանգարանն այժմ շատ լավ պահպանված է, ունի լուսավորություն, ջրի ու սննդի պաշարներ, կարելի է այնտեղ 1 ամիս հանգիստ ապրել:
Այս թանգարանը դարձել է նաև նկարահանումների հրապարակ՝ այստեղ նկարահանվել են հանրության կողմից սիրված ֆիլմեր:
Թանգարանն իր ոճով և հարմարավետությամբ յուրօրինակ է: Այս հիասքանչ ձեռակերտ թանգարանն իր կատարելությամբ զիջում է միայն բնությանը:
Սոսե ԹՈՐՈՍՅԱՆ
Լուսանկարը՝ «Հետք»-ի
