ՀՅԴ բյուրոյի տնտեսական հետազոտությունների գրասենյակի պատասխանատու Սուրեն Պարսյանը չի բացառում, որ խոշոր առևտրային կենտրոններում ստուգումները և հավասար դաշտում աշխատելու պահանջը կարող է հանգեցնել այդ ցանցերում որոշ ապրանքատեսակների գծով գների բարձրացման:
«Հենարան» ակումբում լրագրողների հետ հանդիպմանը հարցին՝ նման ստուգումներից հետո խոշոր առևտրային ցանցերը կկարողանա՞ն նույն եկամտաբերությամբ աշխատել, պարոն Պարսյանը պատասխանեց. «Չգրանցված աշխատակիցների փաստի շնորհիվ նրանք ունեն մրցակցային առավելություն ի տարբերություն փոքր ու միջին բիզնեսի: Լրացուցիչ ծախսերի առկայության դեպքում գնային քաղաքականությունը կվերանայեն. առանձին ապրանքների դեպքում գուցե գները բարձրացնեն: Կգնան ծախսերի նվազեցման, արդյունավետության աճի: Ստիպված կլինեն ինտենսիվ եղանակով ցանցերի արդյունավետությունը բարձրացնել»:
Ըստ Սուրեն Պարսյանի՝ լուծումը մեկն է. «Խոշոր առևտրային ցանցերը պետք է վճարեն ԱԱՀ գյուղատնտեսական մթերքների դեպքում: Այդ դեպքում բավականին մեծ գումարներ կգան պետբյուջե: Թող մի քիչ էլ թանկ վաճառեն ապրանքները, ո՞վ ասաց, որ պետք է բոլոր ապրանքների գծով մրցակցություն ունենան: Գյուղմթերքներն էլ թող թանկ լինեն այդ ցանցերում: Ո՞վ ասաց, որ սուպերմարկետները պետք է բոլոր եկամուտները հավաքագրեն, բա փոքր ու միջին բիզնե՞սը»:
Հիշեցնելով, որ ՊԵԿ-ը հայտարարեց՝ սկսվել է կոնկրետ վերահսկողություն խոշոր առևտրային ցանցերում, Սուրեն Պարսյանը պահանջեց հայտարարել կոնկրետ արդյունքներ՝ քանի՞ չգրանցված աշխատող է բացահայտվել, ի՞նչ արդյունքներ ունենք, ի՞նչ ծավալի խախտումների մասին է խոսքը:
Էլեկտրաէներգիայի և բնական գազի սակագների նվազեցման հնարավորության մասին խոսելով՝ Սուրեն Պարսյանը փաստեց. «Բնական գազի և էլեկտրաէներգիայի համակարգերում դեռ գոյություն ունեն բարձր տեխնոլոգիական անխուսափելի կորուստներ, որոնք դրված են սակագնի հաշվարկման հիմքում: Գազի դեպքում այդ կորուստը 5,37 տոկոս է և սակագնի վրա մեծ ազդեցություն ունի: Կոնկրետ այս կորստի հաշվարկը իրականացվում է բավականին հին՝ 2000-ականների մեթոդաբանությամբ: Նախ պետք է այդ մեթոդաբանությունը փոխվի»:
Ըստ պարոն Պարսյանի՝ մարդիկ առանձին գազի սպասարկման համար չպետք է վճարեն. «Այդ ծախսերը կարելի է մտցնել սակագնի մեջ, և միաժամանակ այլ ծախսերի հաշվին սակագինը կարելի է իջեցնել: Թե չէ նույն տրամաբանությամբ էլեկտրաէներգիայի դեպքում էլ կարելի է այդպիսի կազմակերպություն ստեղծել, որը կգա ներքին անվտանգության վիճակը կգնահատի»:
Տաթև ՀԱՐՈՒԹՅՈՒՆՅԱՆ
