ՀԾՖ գլխավոր քարտուղար եւ տղամարդկանց հավաքականի գլխավոր մարզիչ Փաշիկ Ալավերդյանն Aravot.am-ի հետ զրույցում ասաց. «Սպորտում, մասնավորապես ծանրամարտում, պետք է տարին 12 ամիս եւ օրը 24 ժամ մարզվել, մանավանդ այն պայմաններում, որն այսօր աշխարհն է առաջարկում: Նկատի ունեմ արգելված նյութերի օգտագործման դեմ պայքարը եւ խստագույն վերահսկողությունը: Դրա համար մարզիկից պահանջվում է խստագույն կարգապահություն եւ մարզումներ, մարզչից՝ մասնագիտական խորը գիտելիքներ:
Մենք աշխատում ենք այնպես, որպեսզի մարզիկի մեջ արթնանա բնական տեստոստերոնը, որը խթանում է օրգանիզմի դիմադրողականությունը եւ բարձրացնում աշխատունակությունը: Մարզիչը պետք է կարողանա ճիշտ կազմակերպել մարզիկի ռեժիմը, աշխատանքային առօրյան՝ մարզումների ծանրաբեռնվածության աստիճանը, վերականգնման ընթացքը եւ սննդակարգը, որպեսզի մարզիկի օրգանիզմը կարողանա ճիշտ աշխատել: Միայն այսպես կարելի է հավասար խոսել Եվրոպայի, աշխարհի կամ օլիմպիական խաղերի մասնակից մարզիկների հետ:
Հիմա մենք համատեղ հավաք ենք անցկացնում տարբեր տարիքային խմբերի ծանրորդների մասնակցությամբ: Սա նոր երեւույթ չէ: Ես այդպես վարվում եմ, որպեսզի սերնդափոխությունը հընթացս իրականացվի: Իմ գլխավորած հավաքականում եւ պատանիներ կան, եւ երիտասարդներ, եւ մեծահասակներ: Այսօր հավաքականում միակ մեծահասակը Ռուբեն Ալեքսանյանն է, մյուսները գերազանցապես մինչեւ 23 եւ 20 տարեկաններն են: Սա օգնում է, որպեսզի ապագայում տարիքային խմբերի հավաքականների մեջ ճեղքվածք չառաջանա:
Այս հավաքի մասնակիցները վաղը կգնան տուն, իսկ հունիսի 4-ից գրեթե նույն կազմով կրկին կհավաքվենք արդեն Ծաղկաձորում:
Հունիսի սկզբից «Օլիմպավանում» հավաք կսկսեն պատանի տղաները, իսկ աղջիկները՝ կգնան Աբովյան քաղաք: Նրանք նախապատրաստվում են հուլիսի վերջին Միլանում կայանալիք իրենց տարիքային խմբի Եվրոպայի առաջնությանը: Իտալիայում հանդես ենք գալու տղաների եւ աղջիկների երկու տարիքային խմբերում՝ մինչեւ 15 տարեկան եւ 15 տարեկանից բարձր»:
Փաշիկ Ալավերդյանը տեղեկացրեց նաեւ, որ Հայաստանի հակադոպինգային ծառայությունը մինչեւ հավաքի ավարտը հավաքականի անդամների եւ մարզիչների համար հատուկ սեմինար է անցկացնելու:
Աշոտ ՀԱԿՈԲՅԱՆ
