Այսօր հայտնի դարձավ, որ Արցախի Հանրապետությունում ստեղծվել է «Լույս Արցախին» նախաձեռնությունը: Այն հանդես է գալիս համախմբման եւ տեղի իշխանություններին հեռացնելու նախաձեռնությամբ: Նախաձեռնության հեղինակը Արցախի խորհրդարանի նախկին պատգամավոր Վահան Բադասյանն է: Ի դեպ, նախաձեռնության անդամ է նաեւ Արցախի ԱԱԾ քարտուղար Վիտալի Բալասանյանի եղբայրը`Վաչիկ Բալասանյանը:
«Նուրբ հարց է, դա կարող է բավականին վտանգավոր հետեւանքներ ունենալ: Արցախը պետք է մնա անձեռնմխելի»,- Aravot.am- հետ զրույցում ասաց ՀՀԿ խմբակցության ղեկավար Վահրամ Բաղդասարյանը`անդրադառնալով նախաձեռնության ստեղծմանը:
ՀՀԿ-ական պատգամավորը կարծում է, որ Արցախին պետք չէ խառնել այն գործընթացներին, որոնք եղել են Հայաստանում։ Ինքը տեղյակ չէր նախաձեռնության գործունեության մանրամասներից, բայց հորդորում է հեռանկարային մոտեցումներ ցուցաբերել:
«Պետք է ռեալ գնահատական տալ նրան, թե ինչ կարող է լինել, եթե Արցախում ներքաղաքական իրավիճակը խարխլվի: Չեմ կարծում, թե Արցախում նման գործողություններ սկսելու հիմքեր կան։ Սպասենք, տեսնենք զարգացումները»,-ասաց մեր զրուցակիցը`հավելելով, որ նորմալ է, երբ կան իշխանությունից դժգոհներ եւ, որ նրանք առարկություններ պետք է ունենան. «Որեւէ անգամ պարտվողներն իրենց պարտությունը չեն ընդունում: Բայց չեմ կարծում, որ ճիշտ ճանապարհ է Արցախի ներքաղաքական իրավիճակը լարելը»:
Դիտարկմանը`գուցե ժողովրդավարական գործընթացները ավելի դրական անդրադառնան Արցախի խնդրի կարգավորման վրա, Վահրամ Բաղդասարյանն ասաց`սպասենք իրադարձությունների զարգացմանը: Բայց որքան ինքն է տեղյակ`Արցախում նման խնդիրներ չկան եւ չեն կարող առաջանալ:
Նելլի ԳՐԻԳՈՐՅԱՆ
