Վերաքննիչ Քրեական դատարանում, որտեղ այսօր, հիշեցնենք, հետաձգվեց Ժիրայր Սեֆիլյանի եւ մյուսների գործով վերաքննիչ բողոքի քննությունը, իրարամերժ հայտարարություններ հնչեցին: Դատավորները հայտարարեցին, որ ամբաստանյալներին դատարան չեն բերել՝ ոստիկանության ուղեկցող գումարտակի ծանրաբեռնվածության պատճառով, իսկ նիստի ավարտին՝ դատարանի միջանցքում, «Սասնա ծռերի» գործով ամբաստանյալ, Սեֆիլյանի աջակից Կարո Եղնուկյանը, որի խափանման միջոց կալանքը վերջերս փոխվեց եւ նա ազատ արձակվեց գրավի դիմաց, հայտարարեց՝ բարձրաստիճան ոստիկաններից մեկն իրեն այլ պատճառաբանություն է ներկայացրել:
Եղնուկյանը չհայտնեց, թե որ բարձրաստիճան ոստիկանն է իր հետ խոսել, բայց նշեց, որ ըստ նրա՝ Սեֆիլյանին եւ մյուսներին դատարան չեն բերել, քանի որ մտավախություն ունեն, որ աջակիցները կշրջափակեն դատարանի շենքը, ինչպես վերջերս՝ «Սասնա ծռերի» պարագայում, երբ ոստիկանները նրանց օրեր շարունակ չէին կարողանում դատարանից տեղափոխել ՔԿՀ-ներ:
Հավելենք, որ Սեֆիլյանի աջակիցներն այս պահին բողոքի երթով շարժվում են դեպի ՀՀ վճռաբեկ դատարան: Ժիրայր Սեֆիլյանի փաստաբան Տիգրան Հայրապետյանը կասկած էր հայտնել, որ Վերաքննիչ քրեական դատարանը Վճռաբեկ դատարանի հրամանի ազդեցության ներքո է:
Լուիզա ՍՈՒՔԻԱՍՅԱՆ
