«Անցած տարիներին մեր տնտեսությունում կառուցվածքային տեղաշարժերը ինչպես եք գնահատում»,- այսօր խորհրդարանում շարունակվող 2017 թվականի բյուջեի կատարողականի քննարկումների ժամանակ ՊԵԿ նախագահի առաջին տեղակալ Ռաֆիկ Մաշադյանին հարցրեց ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանը: Պատգամավորին հետաքրքրում էր խոշոր բիզնեսի տեղաշարժը. «6-7 տարի առաջ 80-85 գերհզոր ընկերություն կար, դրանք իջան, ի՞նչ է կատարվում, խոսքը վերաբերում է մոնոպոլիաների ձեւակերպմանը: Ո՞րն է դրանց ձեւավորման հիմնական պատճառը»: Միքայել Մելքումյանը նկատեց նաեւ`ստվերի կրճատման առումով սպասելիքները շատ են: Միեւնույն ժամանակ, պատգամավորը նկատեց, ստվերից դուրս բերման արդյունքում որոշ ընկերություններ կարող են փակվել:
Ռաֆիկ Մաշադյանը հավաստիացրեց`Հայաստանում ՊԵԿ-ն իր գործողություններով չի նպաստել մենաշնորհների ձեւավորմանը. «Համենայնդեպս, հարկային վարչարարությունը կիրառելիս ձեռնպահ ենք մնացել` անուններ լսելիս չանենք վարչարարություն»:
Միքայել Մելքումյանը հակադարձեց`դա ոլորտի աշխատակիցների «հավատարիմ սկզբունքն է» եւ հիշեցրեց ԱԱԾ-ի վերջին բացահայտումը`սուպերմարկետների մասով, երբ 5% հարկ են վճարել 20%-ի փոխարեն:
Ռաֆիկ Մաշադյանը պարզաբանեց`սուպերմարկետներում խնդիր է առաջացել, որովհետեւ մեր երկրում կան հարկման տարբեր ռեժիմներ:
Հարկերի հավաքագրումը արտահայտո՞ւմ է մեր իրականությունը, արդյոք բազմաթիվ ներկրողներ չեն շրջանցել մաքսային մարմինները եւ հսկայական գումարներ չմուտքագրվելով՝ բյուջեն տուժել է`թեման շարունակեց «Ծառուկյան» խմբակցության պատգամավոր Սերգեյ Բագրատյանը:
«Ես հայտնում եմ պատասխանատու ձեւով` նախկին իշխանության օրոք ամեն ինչ արել եք տնտեսությունը մոնոպոլիզացնելու համար եւ եթե գնահատական չտաք, վստահեցնում եմ այս մեթոդները չեն վերանալու»,- շարունակեց Սերգեյ Բագրատյանը` հակադարձելով ՊԵԿ նախագահի տեղակալի այն հայտարարությանը, թե իրենք չեն նպաստել մենաշնորհների ձեւավորմանը:
ՊԵԿ փոխնախագահը հստակեցրեց`իր հայտարարությունը վերաբերվում է ՊԵԿ-ի իրականացրած գործառույթներին. «Թե նախկինում եղել են գործողություններ մաքսային մարմինների կողմից, որոնք նպաստել են մենաշնորհների ձեւավորմանը` այդ տեղեկատվությանը չեմ տիրապետում: Եթե նման բան եղել է, իմ կարծիքով դա ճիշտ չի եղել, իսկ հիմա, որ նման մոտեցում չի լինի, ես, որպես ՊԵԿ նախագահի տեղակալ, վստահ եմ»:
Նելլի ԳՐԻԳՈՐՅԱՆ
