Քիչ առաջ ՀՀ վերաքննիչ քրեական դատարանում Ժիրայր Սեֆիլյանի շահերի պաշտպան փաստաբան Տիգրան Հայրապետյանը լրագրողներին տեղեկացրեց, թե որն է ամբաստանյալներին դատարան չներկայացնելու պատճառը: Փաստաբանը նշեց. «Ըստ ոստիկանության գրության՝ Սեֆիլյանին եւ մյուսներին դատարան չէին բերել, քանի որ ոստիկանությունն այս պահին չունի համապատասխան ուժեր 7 ամբաստանյալի դատարան ներկայացնելու համար»:
Տիգրան Հայրապետյանը ոստիկանության գրությունն անհեթեթ է որակում եւ ընդգծում, որ ոստիկանությունը պարտավոր է ենթարկվել Վերաքննիչ քրեական դատարանի որոշմանը եւ ամբաստանյալներին դատարան ուղեկցել: Ապա փաստաբանը նշեց, որ ցանկանում է լրագրողների միջոցով հաղորդում տալ հանցագործության մասին. «Ազգային անվտանգության ծառայությանը կոչ եմ անում քննել եւ պարզել, թե արդյոք ՀՀ վճռաբեկ դատարանի կամ Բարձրագույն դատական խորհրդի պատվերով է, որ Սեֆիլյանին եւ մյուսներին դատարան չեն ներկայացրել»: Հիշեցնենք, որ այսօր Վերաքննիչ քրեական դատարանում հետաձգվեց Շուշիի առանձնակի գումարտակի հրամանատար Ժիրայր Սեֆիլյանի եւ մյուսների վերաքննիչ բողոքի քննությունը:
Լուիզա ՍՈՒՔԻԱՍՅԱՆ
