Վտանգավոր ձկնորսություն՝ սահման հանդիսացող Ջողազի ջրամբարում

Ջողազի ջրամբարը գտնվում է հայ-ադրբեջանական սահմանին, այն փաստորեն սահման է հանդիսանում: Ջողազի ջրամբարը մեծ հանդիսավորությամբ շահագործման հանձնվեց 1980թ.: Խորհրդային տարիներին այդ ջրամբարի ջրերով ոռոգվում էին Նոյեմբերյանի, Իջեւանի տարածաշրջանների, Ադրբեջանի Ղազախի շրջանի հողերը: 1990թ. հայ-ադրբեջանական հարաբերությունների լարվելուց հետո Ջողազի ջրամբարից սնուցվող ոռոգման համակարգը դադարեց գործել, ադրբեջանցիները թալանեցին ջրամբարից ջուր մղող պոմպակայանը, իրենց տարածքով ձգվող ոռոգման խողովակաշարը:

Ջողազի ջրամբարի աջ ափին գտնվող, Իջեւանի տարածաշրջանի սահմանամերձ Բերքաբեր գյուղի բնակիչները շուրջ 25 տարի հնարավորություն չունեն օգտվել 44 միլիոն խորանարդ մետր տարողությամբ ջրամբարի ջրերից: Ադրբեջանական զինուժը պարբերաբար Բերքաբերը գնդակոծում է ջրամբարի ձախ ափին գտնվող Մազամլի գյուղի մոտակա հենակետերից: Բերքաբերցիները ռիսկ անելով՝ փչովի նավակներով լճում ձկնորսություն են անում: Դա վտանգավոր է, ադրբեջանական զինուժը ձկնորսներին թիրախ է դարձնում:

2014թ. դեկտեմբերի 14-ին ադրբեջանցիները Բերքաբերի բնակիչ, 1981թ. ծնված Աղասի Թամրազյանի վրա բազմաթիվ գնդակներ արձակեցին: Բարեբախտաբար, գնդակները դիպել էին նրա ոտքի սրունքների շրջանում, կյանքի համար վտանգ չէին ներկայացնում: Բերքաբերցիները հայտնեցին, որ Աղասի Թամրազյանը ներկայումս աշխատում է Ռուսաստանում:

Բերքաբերցիներն ասացին, որ իրենց համագյուղացիները արհեստական լճում նավակների միջոցով, ուռկաններով որս են անում: Նրանցից ոմանք, վախենալով ջրամբարի ձախ ափին գտնվող ադրբեջանական հենակետերերի դիպուկահարներից, գիշերով են ձկնորսության գնում:

Բերքաբերի հողերը մեծ մասը գտնվում է ջրամբարի ձախ ափին, ադրբեջանցիներն են դրանք մշակում: Բերքաբերցիները ապրուստի միջոցներ չունենալով`մահացու վտանգավոր ձկնորսությամբ են զբաղվում: Սահմանամերձ գյուղի ձկնորսները`իրենց որսացածը որպես սնունդ օգտագործում են, նաեւ վաճառում Իջեւանի տարածաշրջանի ռեստորաններին:

Ոսկան ՍԱՐԳՍՅԱՆ