Այս պահին «ԵՊՀ տոտալ ռեստարտ» նախաձեռնության անդամներն ու դասադուլին միացած ուսանողները նստացույց են անում ԵՊՀ ռեկտոր Արամ Սիմոնյանի աշխատասենյակի առաջ: Նրանք որոշել են չհեռանալ այնտեղից մինչև Արամ Սիմոնյանը հրաժարականի դիմում չներկայացնի:
Մինչդեռ Արամ Սիմոնյանը հայտարարել էր, որ ճնշման ներքո չի տա հրաժարական և որ ԵՊՀ ուսանողները 150-200 հոգին չեն, այլ 17.000-ից ավելի: Նա նշել էր, որ եթե 2000 ստորագրություն հավաքվի հրաժարականի պահանջով, ապա կմտածի հրաժարականի դիմում գրելու մասին:
Ռեկտորը նաև հայտնեց, թե ուսանողները կուսակցական խնդիր են լուծում:
Students demanding the resignation of the YSU Rector met him in order to negotiate at the YSU
Առաջին փոխվարչապետ Արարատ Միրզոյանի աշխատակազմի ղեկավար Վահան Կոստանյանն այս առիթով պարզաբանեց, թե ցույցին մասնակցում է որպես ԵՊՀ արևելագիտության ֆակուլտետի ուսանող. «Այն հակասությունները, որ կան Արամ Սիմոնյանի ղեկավարության տարիներին մեր միջև, նոր չեն, որ ծագել են թե՛ ինձ մոտ, թե՛ իմ ընկերների: Առնվազն երեք տարվա հրապարակային կյանք ունեն»:
Այն վստահեցմանը, թե չի պատրաստվում հրաժարական տալ ճնշման ներքո, Վահան Կոստանյանն արձագանքեց, թե սա քաղաքացիական խաղաղ անհնազանդության ձև է, որ շատ հոգեհարազատ է իրենց:
«ԵՊՀ տոտալ ռեստարտ» նախաձեռնության անդամ Դավիթ Պետրոսյանն էլ տեղեկացրեց, որ ժամը 18.00-ին Չարենցի այգում նախատեսված համերգը տեղափոխել են ԵՊՀ գիտխորհրդի նիստերի դահլիճ: Այնուհետև հավելեց. «Եթե Արամ Սիմոնյանը հրաժարական տված լինի, ինքն էլ կմասնակցի այդ համերգին. համ իր հրաժարականը կնշենք, համ էլ ռեստարտի համերգը կկայանա»:
Դավիթ Պետրոսյանը վստահեցրեց՝ ուսանողությունն այլևս երբեք չի նահանջելու, գնալու է առաջ այնքան ժամանակ, մինչև որ այն արժեքներն ու սկզբունքները, որ հռչակվել են հեղափոխության ժամանակ, համապատասխանեն մեր իրականությանը:
Տաթև ՀԱՐՈՒԹՅՈՒՆՅԱՆ
