ՀՀԿ խմբակցության նիստում ՀՀԿ խմբակցության պատգամավոր Շիրակ Թորոսյանը հայտարարել է, որ ինքը դուրս է գալիս ՀՀԿ խմբակցությունից:
Լրագրողների հետ զրույցում նա ասաց, որ իր որոշման պատճառ է եղել այն, որ անհամատեղելիություն է եղել իր կուսակցության եւ ՀՀԿ-ի միջեւ. «Ելնելով քաղաքական գործընթացների անհամատեղելիություն, ելնելով նրանից, որ իմ կուսակցությունը «Հզոր հայրենիքը» հնարավոր է, որ առաջիկայում սպասվելիք արտահերթ ընտրություններին առանձին գնալու որոշում կայացնի, հետեւաբար չի կարող մի կուսակցության փոխնախագահ, որը պատրաստվում է քաղաքական գործընթացներում լինել մեկ այլ խմբակցության կազմում, ես հայտարարեցի ՀՀԿ խմբակցությունից դուրս գալու մասին: Հայտնեցի, որ շնորհակալ եմ բոլորինն՝ երկար աշխատանքի համար, մարդկային հարաբերությունները չեն տուժում»:
Թորոսյանն ասաց, որ մանդատը վայր դնելու հարց չի քննարկվել, մանդատը ընտրողների համար է, ընտրողներին է ծառայել եւ շարունակելու է ծառայել. «Ես խորհրդարանում էի հազարավոր ընտրողների շնորհիվ, հենց այնպես ոչինչ չի լինում»:
Թե ինչպես արձագանքեցին ՀՀԿ-ից՝ նա պատասխանեց. «Խմբակցությունը ըմբռնումով մոտեցավ, որեւէ վեճ, վիճաբանություն, հակափաստարկ, որեւէ նեղացկոտություն չի եղել նիստում: Ես հայտարարել եմ, բերել եմ իմ հիմնավորումները»:
Նա ասաց, որ չի զղջացել՝ Փաշինյանի օգտին քվեարկելու համար:
Լրագրողները հետաքրքրվեցին՝ ասում եք՝ անհամատեղելիությունն է պատճառը, ո՞րնէ եղել անհամատեղելիությունը՝ նա պատասխանեց. «Օրինակ, մայիսի 8-ի քվեարկությանը անհամատեղելիություն էր իմ մոտեցումների, իմ ընտրողների պահանջի եւ խմբակցության որոշման միջեւ»: Հիշեցնենք, որ Շիրակ Թորոսյանը ՀՀԿ խմբակցության անդամ է 2007 թվականից եւ մշտապես ընտրվել է համամասնական ընտրակարգով:
Հռիփսիմե ՋԵԲԵՋՅԱՆ
