Կառավարության նիստում վարչապետ Նիկոլ Փաշինյանը խոսում էր գյուղատնտեսական վարկերի տույժ-տուգանքները ներելու մասին: Այսօր ԱԺ-ում լրագրողների հետ զրույցում պատասխանելով այդ վարկերի տուգանքները զիջելու հետ կապված հարցին՝ ԿԲ նախագահ Արթուր Ջավադյանն ասաց. «Տույժ-տուգանքները ներելու համար պետք են համապատասխան մեխանիզմներ: Հիմա այդ մեխանիզմների մասով համապատասխան կառավարության որոշումներ պետք է լինեն: Հանձնարարականներ տրվել են վարչապետի կողմից պատկան մարմիններին, եթե չեմ սխալվում, այս շաբաթ կառավարության նիստում կլինեն որոշումներն այդ մասին, դրանք էլ կվերածվեն օրենքի: Օրենքի ընդունման պարագայում մեր բանկերը պատրաստ են որոշակիորեն զիջել տույժ-տուգանքները, բայց որպեսզի այլ տպավորություն չստեղծվի, երեւի թե խոսքը գնալու է հին տույժ-տուգանքների մասին, ոչ թե գործող»:
Հարցին՝ ինչպե՞ս է որոշվելու՝ ում պարտքերն են ներելու՝ Արթուր Ջավադյանը պատասխանեց. «Կառավարությունը կորոշի, որովհետեւ օրենք են բերելու ԱԺ: Ինձ թվում է, մի դիսկրետ կետ կվերցվի»:
Խոսելով գյուղատնտեսական ապահովագրության մասին՝ Արթուր Ջավադյանն ասաց, որ բավականին աշխատանք է տրամադրվել. «Գյուղնախարարության հետ արդեն ունենք ստորագրված հուշագիր, կարծեմ գրանտ է տրամադրվելու կառավարությանը, առաջին փուլը նախատեսված է հաջորդ տարի, եթե չեմ սխալվում»:
Հռիփսիմե ՋԵԲԵՋՅԱՆ
