«Նախորդ իմ պաշտոնում ես որոշակի շփումներ ունեցել եմ այդ խնդրին։ Երբ ՊԵԿ-ի եւ ֆինանսների նախարարության կողմից հրապարակվեց պաշտոնական պարզաբանումը, առաջին անգամ փորձեցինք փաստաթղթավորել հավաքական բեռներ բերողների ձեռքբերումը։ Այսինքն՝ «Նորֆոլկի» կողմից հավաքական բեռներ բերողներին կիլոգրամով մաքսազերծում իրականացնելուց հետո տեսականիով փաստաթղթեր էին տրամադրվում, որոնք շրջանառության հարկով հարկվելու դեպքում համարվում էին ձեռքբերումը հիմնավորող փաստաթղթեր։ Սա մի շատ կարեւոր քայլ էր, որ մենք կատարեցինք»,- այսօր խորհրդարանում, 2017 թվականի բյուջեի կատարողական քննարկումների ժամանակ ասաց ՀՀ ֆինանսների նախարարի նախկին տեղակալ, այժմ Պետական եկամուտների կոմիտեի նախագահ Դավիթ Անանյանը։ Նա պատասխանում էր «Նորֆոլկ Քոնսալթինգ» ընկերությունում ԱԱԾ-ի կողմից իրականացված բացահայտումներին վերաբերող հարցին:
Հարցը հնչեցրել էր «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանը` հիշեցնելով, որ այդ խնդիրն իրենք անցյալ տարի էլ էին բարձրաձայնել: Միքայել Մելքումյանին հետաքրքրում էր, թե ինչո՞ւ նախկինում պետական կառավարման լիազոր մարմինը՝ ֆինանսների նախարարությունը, չի արձագանքել մենաշնորհային մարմնի ստեղծման եւ գործունեության ահազանգերին:
ՊԵԿ նախագահը շարունակեց`մեխանիզմը, որը նախատեսվել էր, ճիշտ կլիներ իրականացնել պետական մասնակցությամբ բաժնետիրական ընկերություն հիմնելով, որովհետեւ այն գործառույթը, որ իրականացնում էր «Նորֆոլկը», նախկինից ժառանգած մութ, գաղտնի, կոռուպցիոն ռիսկերով թաթախված իրավիճակի որոշակի շտկում անելու նպատակադրում է ունեցել. «Նորֆոլկը», ըստ էության, բացել են այն նպատակով, որ բեռնափոխադրումները մաքսազերծման գործընթացից տարանջատվի եւ մաքսազերծումն իրականացվի մաքսային մարմնի կողմից վերահսկելի գործառույթներով։ «Նորֆոլկն» ի սկզբանե ստեղծվել է որոշակի կարգավորումներ անելու նպատակով։ Ինչքանո՞վ է դա հաջողել, քննությունը ցույց կտա: Ես կարծում եմ, որ նախկինի համեմատ՝ «Նորֆոլկը» բավականին թափանցիկ իրավիճակ է ստեղծել՝ միգուցե նաեւ որոշակի շեղումներ անելով իր գործունեության մեջ»:
Նելլի ԳՐԻԳՈՐՅԱՆ
