«Օրենքը լրամշակելու եւ քաղաքացիների կարծիքը հաշվի առնելու համար է ժամանակ վերցվել: Ես առաջարկում եմ հետաձգել օրենքի կիրառումը եւ վերանայել այն դրույթները, որոնք մեր քաղաքացիների համար ընդունելի չեն»,- այսօր խորհրդարանում լրագրողների հետ զրույցում ասաց Աշխատանքի եւ սոցիալական հարցերի նախարար Մանե Թանդիլյանը` պարզաբանելով թե ինչո՞ւ մեկ տարով հետաձգվեց պարտադիր կուտակային կենսաթոշակային համակարգի կիրառումը:
Հիշեցնենք, այն հուլիսի մեկից արդեն պետք է գործեր: Ի դեպ, այն դեռ մեկ տարի առաջ պետք է ներդրվեր, սակայն տարբեր վեճերի արդյունքում մեկ տարով հետաձգվել էր:
Մանե Թանդիլյանն ասում է, որ բազմաթիվ առաջարկներ է ստացել: Դրանք «բավականին խելամիտ եւ ողջամիտ են»: Առաջարկներն ուսումնասիրելու համար իրեն ժամանակ է պետք: Նա կարծում է, որ «քննարկման արժանի» առաջարկներ կան:
Լրագրողները նկատեցին` տնտեսագետները մտավախություններ ունեն, համակարգի ներդրման հետաձգման պարագայում տարբեր խնդիրներ կարող են առաջանալ: Նախարարը պատասխանում է`բոլոր խնդիրները լուծելի են. «Հենց դրա համար են քննարկումները, որ խնդիրներին լուծում տրվի: Դրա համար պետք է ներգրավենք բոլոր կոմպետենտ, մասնագետ մարդկանց, որպեսզի կարողանանք լավագույն լուծումը գտնել, որ համակարգն ընդունելի լինի»:
Նելլի ԳՐԻԳՈՐՅԱՆ
