«Առաջիկայում սպասեք նոր բացահայտումների՝ տարբեր ուղղություններով: Այս պահին ես զբաղված եմ ԿԳՆ-ում միջոցների արդյունավետ բաշխման խնդրով, որովհետեւ տասնյակից մինչեւ հարյուր միլիոնավոր դրամներ անիմաստ ուղղություններով են բաշխվել՝ սկսած ամսագրերի բաժանորդագրություններից մինչեւ տարբեր ծրագրեր»,-լրագրողների հետ զրույցում այսօր հայտարարեց կրթության եւ գիտության նորանշանակ նախարար Արայիկ Հարությունյանը:
Նա անդրադարձավ նաեւ իր այն հրապարակմանը, որ բուհերը որոշակի գումար են վճարել «հանրապետական» Կարեն Ավագյանի «Հայաստանի երիտասարդական հիմնադրամ»-ին: «ՀԵՀ-ում աուդիտ կիրականացվի, կհասկանանք՝ ի՞նչ ծախսեր են կատարվել, իսկ բուհերն այլեւս չեն վճարի այդ գումարները»,-տեղեկացրեց նախարարը:
ԵՊՀ ղեկավարության վերաբերյալ ուսանողների բողոքի ալիքի մասին էլ Արայիկ Հարությունյանը նշեց. «ԵՊՀ ղեկավարությունը նախկին տարիներին ինքն իրեն արդեն վարկաբեկել է»: Անդրադառնալով «Այդ» դպրոցի խնդրին՝ նա հայտարարեց. «Այբ»-ի հետ կապված թնջուկ չկա: Կա Արարատյան բակալավրիատի եւ Տեր Մեսրոպի քաղաքական գործունեության հետ կապված խնդիր»: Հիշեցնենք՝ Հարությունյանը հայտարարել էր, որ «Այբ» դպրոցի հոգաբարձուների խորհրդի նախագահ, Սերժ Սարգսյանի նախկին խորհրդական Տեր-Մեսրոպ քահանա Արամյանը հանրակրթության ոլորտին ամենամեծ վնասը հասցրած մարդկանցից մեկն է:
Լուիզա ՍՈՒՔԻԱՍՅԱՆ
