Երրորդ օրն է՝ Կապանի լեռնահարստացման կոմբինատի աշխատակիցները գործադուլ են անում: Այսօր վեց աշխատակից նստել է հացադուլի:
Աշխատակիցները պահանջում են 40 տոկոսով բարձրացնել աշխատավարձերը: Նրանք այսօր երթ են կազմակերպել դեպի մարզպետարան, քաղաքապետարան: Կոմբինատի աշխատակիցները Aravot.am-ի հետ զրույցում նշեցին, որ իրենց կատարած աշխատանքի դիմաց անհամարժեք են վարձատրվում եւ պահանջում են, որ սեփականատերը վերանայի աշխատավարձերը՝ հակառակ դեպքում գործադուլը կշարունակեն:
Կոմբինատը, որը արդյունահանում է հանքաքար, տնօրինում է ռուսական «Պոլիմետալ» ընկերությունը՝ մի քանի տարի առաջ:
Մեզ հետ զրույցում աշխատակիցները պատմեցին, որ տասը օր առաջ գործարանի տնօրինության հետ նստել են բանակցությունների՝ աշխատավարձը բարձրացնելու հորդորով:
«Պատասխանեցին, որ մեր աշխատավարձը կվերանայեն հոկտեմբերին՝ 5 տոկոս բարձրացումով: 5 տոկոս բարձրացումը ստացվում է 5 հազարից մինչեւ 8 հազար դրամ աշխատավարձ, ըստ մասնագիտությունների, որը որ այս պարագայում զրո է, մենք պահանջեցինք, որ ամենապակասը 40 տոկոսով բարձրացնեն, 60-ից մինչեւ 80 հազար դրամ:
Հանքի օժանդակ բանվորը, որն աշխատում է փակ հանքում, ավելի քիչ է ստանում, քան՝ դրսի հաց ցրողը: Կան նաեւ բարձր ստացողներ՝ կախված մասնագիտությունից, ասենք՝ մեքենավարը կարող է ստանալ մինչեւ 350 հազար դրամ աշխատավարձ, բայց դա ստանալու համար ինքը շնչում է ամեն հերթափոխին 7 ժամով 100 լիտր սալյարկայի ծուխ, գումարած պայթուցիկ նյութերից գազ, գումարած թթվածնի պակասություն, գումարած քարի փոշի: Այսօր, որ գնում ես հիվանդանոց, ամենապակասը 100-150 հազար դրամ միայն անալիզներին ենք վճարում»:
Գործադուլի մասնակիցները նշեցին, որ գլխավոր տնօրենն ի պատասխան իրենց բողոքի՝ պատասխանել է, որ աշխատավարձերը չեն վերանայելու, ավելին՝ հայտնել է, որ վաղը 200 աշխատակցի աշխատանքից հեռացնելու է եւ որ ծանուցումները կստանան փոստով:
Աշխատակիցների տվյալներով, կոմբինատն ունի 1200-1300 աշխատակից, սակայն վարչական մասը չի միացել գործադուլին:
Նշենք, որ Կապանի լեռնահարստացման կոմբինատը 1000 խոշոր հարկատուների ցանկում 17-րդ տեղում է եւ անցյալ տարի տասը ամիսների ընթացքում պետբյուջե է վճարել 4 միլիարդ 656 միլիոն 568,7 դրամ հարկ:
Aravot.am-ը կոմբինատի աշխատակիցների գործադուլի հետ կապված հարց ուղղեց կոմբինատի տնօրենի տեղակալ Վահրամ Ավագյանին, որը հասարակայնության հետ կապերի պատասխանատուն է, սակայն պարոն Ավագյանը հորդորեց հարցերն ուղարկել գրավոր:
Պարոն Ավագյանի պատասխանը կներկայացնենք առաջիկայում՝ պատասխանը ստանալուն պես:
Լուսինե ԲՈՒԴԱՂՅԱՆ
