Սարդարապատի հուշահամալիրում այսօր լրագրողների հետ ճեպազրույցում Պաշտպանության նախկին նախարար Սեյրան Օհանյանն անդրադարձավ այն կարծիքներին, թե ԶՈՒ ԳՇ նախկին պետ Մովսես Հակոբյանն ապրիլյան ռազմական գործողություններից հետո առհասարակ պետք է չշարունակեր գործել համակարգում, ոչ թե նշանակվեր Գլխավոր ռազմական տեսուչի պաշտոնում: Քննադատությունների առնչությամբ նա նշեց. «Այն, ինչ ասվում է, վերաբերում է այն ժամանակահատվածին, երբ ես պաշտպանության նախարար էի»:
Ապա հավելեց. «Ապրիլյան պատերազմի մանր-մունր թերությունների մասին չպետք է խոսենք: Ապրիլյան պատերազմում մենք հաղթանակ ենք տարել՝ մեր հրամանատարների եւ զինվորների սխրագործությունների շնորհիվ: Այդ հենքի վրա պետք է կառուցենք մեր բանակի ապագան»:
Հարցին՝ «800 հեկտարի կորուստը հաղթանա՞կ է», նա այսպես արձագանքեց. «Կարծում եմ՝ մենք կարողացել ենք մեր բանակի գործունեության շնորհիվ կասեցնել հակառակորդի հիմնական նպատակները: Իսկ դիրքերի շարժը գտնվում է այսօրվա մեր բանակի խիստ վերահսկողության ներքո: Հակահարձակողական գործողությունները կանգնեցվել են քաղաքական գործողությունների արդյունքում»:
Սեյրան Օհանյանը վստահեցրեց, որ այսօր բանակը պատրաստ է իր առջեւ դրված խնդիրներն իրագործելու՝ թե ռազմական, եւ թե հակահարձակողական:
Լուիզա ՍՈՒՔԻԱՍՅԱՆ
