Սարդարապատի հուշահամալիրում այսօր լրագրողների հետ ճեպազրույցում Պաշտպանության նախկին նախարար Սեյրան Օհանյանը հայաստանյան վերջին քաղաքական զարգացումներում արձանագրված ժողովրդական շարժումը զարթոնք որակեց: «Չկա հայ, որն այդ ամենին հետեւած եւ հիացած չլինի: Այդ երիտասարդական ավյունն ու քաղաքական շարժումը, այդ օրինակելի իրադարձությունները բերեցին նրան, որ փոփոխություն տեղի ունեցավ: Դա հույս է, որ այսօրվա ռազմաքաղաքական ղեկավարությունը նոր աշխատելաոճով պետք է մեր հայրենիքի ապագան ապահովի: Նոր մթնոլորտ է՝ ազատություն, օրինականություն: Այդ մասին նախկինում էլ էինք խոսել, ուղղակի շատ բան թղթի վրա էր մնացել»,-նկատեց նա:
Անդրադառնալով Արտակ Դավթյանի՝ ԶՈՒ ԳՇ պետի պաշտոնում նշանակմանը՝ նա նշեց. «Բոլոր սպաներին հարգում եւ սիրում եմ, բայց այսօրվա ռազմաքաղաքական ղեկավարությունն իր կադրային քաղաքականությունն է վարում, որը ես չեմ մեկնաբանում»:
Սեյրան Օհանյանը շեշտեց, որ հայկական բանակը եւ ՊՆ-ն շարունակական կատարելագործում են ապահովել. «ՊՆ-ն այն կառույցն է, որը ռազմավարական պլանավորման արդյունքում է գործում: Կադրային քաղաքականությունը եւս ռազմավարություն է: Շատ արժանի ընկերներ ունենք, բայց նշանակումները, կրկնում եմ, չեմ մեկնաբանում»:
Գլխավոր ռազմական տեսուչի պաշտոնում Մովսես Հակոբյանի նշանակման մասին քննադատությունների շուրջ էլ Սեյրան Օհանյանն ասաց. «Նա ամենակատարյալ ռազմական գեներալն է՝ իր անցյալով եւ գիտելիքներով, փառավոր մարտական ճանապարհով»:
Լուիզա ՍՈՒՔԻԱՍՅԱՆ
